Alamannicus

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

Alamannicus oder Alamannicus Maximus isch e Siigerbiname (lat. cognomen ex virtute) gsii, wo e römische Chaiser öberchoo het, wenn er e grosse Siig gege d Alemanne errunge het. De Name isch en adjektivischi Ablaitig vom Alemannename. Äänlichi bildige sind Germanicus, Francicus, Gothicus, Vandalicus, Armeniacus, Arabicus, Persicus und no ander mee.

Römer mit em Siigertitel Alamannicus[ändere | Quälltäxt bearbeite]

e Münze vom Chaiser Konstantin II. mit de Uufschrift ALAMANNIA DEVICTA "Alemannie bisigt"
  • de caesar Fl. Iulius Crispus, wegem Siig öber d Alemanne und Franke ane 320.
  • de Fl. Claudius Constantinus II. (337-340), wegem Siig öber d Alemanne ane 330.
  • de Fl. Iulius Constantius II. (337-361) ninnt nochem Siig öber d Alemanne und em Fridesschluss mitem Gundomadus und em Vadomarius de Siigertitel Germanicus Alamannicus Maximus aa.
  • de Fl. Claudius Iulianus (360-363) ninnt nochdem er Chaiser woren isch de Titel Alamannicus aa, uufgrund vo sim erfolgriiche Alemannechrieg
  • de Fl. Valentinianus I. (364-375) und
  • de Fl. Valens (364–378) und
  • de Fl. Gratianus (375–383) nemed ane 368 gmainsam d Siigertitel Germanicus Maximus Alamannicus Maximus Francicus Maximus aa.
  • de Iustinianus I. (527-565) ninnt 527 de Siigebiname Alamannicus aa, um sin Herrschaftsaaspruch öber de verlorni Weströmischi Riichstail z erhebe.