Loonhoof

E aglüegti Version vo derre Site, wo am 8. März 2021 freige worre isch, basiert uff derre Version.

Dr Loonhoof isch e historische Geböidkomplex z Basel. Er befindet sich bi dr Leonhardschille am Koolebärg in dr Groossbasler Altstadt.

Gschicht

S Chorherestift

1206 isch dr Bau, wo denn no käi Naame ghaa het, as Choorheerestift vom Augustinerorde baut worde. Si ersti Erwäänig stammt us em Joor 1668. Dr Vorsteher über s stedtische Bauwääse het dört d Löön an d Handwärker uszaalt, und vo do dr Naame. Dr Vorgängerbau vom Loonhoof und dr Leonhardschille isch e Saalchille gsi, wo woorschinlig im 11. Joorhundert baut worden isch. Dört isch im 12. Joorhundert au e Chloster gsi, wo nume d Friidhoofhalle von em üübrig isch.

S Gfängnis

Lang het mä d Dürm vo dr Stadtmuure as Gfängniss brucht, het die aber no di no ufgee und so het mä e Löösig müesse sueche. Dr Basler Archidekt Amadeus Merian het d Idee ghaa ass mä us em Loonhoof e Bolizeistazioon mit Gfängnis chönnt mache, und 1821 isch d Kantonsbolizei dört iizooge. Dr Merian het s Gfängnis entworfe, aber chirchligi Kräis häi sich gegen es Gfängnis grad näbe dr Chille gweert, und mä het s erst 1835 chönne afo benutze. Dr Merian het dr Boste vom stedtische Baumäister überchoo und het 1839 vorgschlaage, ass mä au d Bolizeidiräkzioon chönnt im Loonhoof underbringe. Das isch fümf Joor spööter au bassiert. 1853 het mä s Geböid under dr Läitig vom Merian no äinisch umbaut.

D Brivatisierig 1995

1995 het mä dr Waaghoof baut und s Gefängnis dörtaane züüglet. Im Loonhoof befinde sich sithär s Hotel «Au Violon» (dr Naame isch en Aaspiilig uf s ehemoolige Gfängnis), die «Baseldytschi Bihni», e Dschääsklub und s «Muusigmuseum Basel». S Museum stammt vom Archidekduurbüro Morger & Degelo. Im Pförtnerhuus befindet sich hüte e Daageshäim.