Böhme

E aglüegti Version vo derre Site, wo am 11. Jänner 2020 freige worre isch, basiert uff derre Version.

Böhme (tschechisch Čechy) isch eins vo de historische Länder vo Tschechie. Au siinä Iiwohner sait mä Böhme.

Geographii

Lag

D Flechi vo Böhme bedrait öbbe 52.060 km². Es gränzt im Nordoste an Pole, im Oste an die historischi Region Mähre, im Süde an Östriich, im Südweste und Weste an Bayre und im Nordweste an Sachse.

Dr historisch Dreiländeregge mit Mähre und Östriich befindet sich uf em Spitz vom Böhmische Sass am Hoche Stei bi Staré Město pod Landštejnem.

Böhme wird au begränzt vo siine vier Randgebirg:

Dr Böhmerwald (südwestligi Gränze zum östriichische Mühlviertel und Bayre)
S Erzgebirg (nordwestligi Gränze zu Sachse)
D Sudete (nördligi und nordöstligi Gränze zu dr Oberlausitz und zu Schlesie)
Die Böhmisch-Mährischi Höchi (östligi Gränze zu Mähre und südligi zum Waldviertel)

Böhme isch aso fast ä Landschaftskessel, siini Gränze si fast überall d Wasserscheide vo de Zueflussgebiet vo der Moldau (Vltava) und der Elbe (Labe) (bis zu dr Gränze mit Dütschland). In d Elbe mündet au d Eger (Ohře), wo s Quellgebiet von erä im Fichtelgebirg z Franke liit. Die südligi Gränze vo Böhme isch Deil vo der Europäische Hauptwasserscheide.

Gliiderig

Böhmen macht die westlige zwei Drittel vo der Tschechische Republik us. Drzue ghöre hüte die tschechischi Hauptstadt Prag (Praha), die Mittelböhmischi Region (Středočeský kraj) um sä ume und d Regione wo im Uhrzeigersinn um die umeligge si Reicheberg (Liberecký kraj), Königgrätz (Královéhradecký kraj), der grösser Deil vom Pardubický kraj, die westlig Hälfti vom Kraj Vysočina, fast die ganzi Südböhmischi Region (Jihočeský kraj), d Region Pilse (Plzeňský kraj), der Karlovarský kraj, der Ústecký kraj um Ústí (Aussig), und Jobova Lhota wo hüt zur Südmährische Region (Jihomoravský kraj) ghört .

Landschaft

Die hütige Gränze vo Böhme si vil meh as 1000 Johr alt, nume s Egerland isch erst im spoote Mittelalter drzuecho. Böhme isch uf drei Siite vo Bärglandschafte umgee, isch aber eigentlig nit ä Chesselland. S Fichtelgebirg schliesst sech an die mitteldütsche Terrasselandschafte aa. Böhme hangt so äng mit Mähre zsämme, ass mä im Gebiet zwüsche dr Eger, Elbe und Donau uf dr einte Siite und dr March und Naab uf dr andere vom enä böhmisch-mährische Terrasseland cha rede.

D Iizugsgebiet vo der Donau und der Oder möche nume 6,4 % vom Gebiet vom Land (3.184 km²) us, das vo dr Elbe macht mit 48.772 km² dr Hauptdeil us. Näbe der Elbe het s no d Moldau, wo bi Mělník in se mündet.

S Terrasseland vo Böhme wird dur d Elbe und d Eger, d Sázava und Berounka und dur die diefe Meridianfurche vo der Moldau gliideret. Die chliine umschlossene Tiefebene si die:

Mostecká pánev (Nordböhmischs Becki)
Dolnooharská tabule
Laun-Saazer Ebeni
Theresienstädter Ebeni
Melniker Ebeni
Nimburger Ebeni
Pardubitzer Ebeni
Jihočeská kotlina (dr südböhmisch Daalchessel, d Budweis-Wittingauer Diefplatte)
- Českobudějovická pánev (S Budweiser Becki)
- Třeboňská pánev (S Wittingauer Becki)