Zürcher Weinland
Us der alemannische Wikipedia, der freie Dialäkt-Enzyklopedy
S Zürcher Wyland isch de nördlich Tail vom Kantoo Züri i de Schwiiz. Binennt isch es, well bis hüt no de Wii e wichtigs Erzügnis isch.
Geografii[ändere]
S Wyland litt zwüschet em Rhii und de Tuur und werd im Oste vom Tuurgi bigrenzt. Im Südweste goots öber d Tuur uus bis an Iirchel ane. Die wichtigste Wiidörfer sind Staame, Benke, Tachse und Uewise. De Wiibau werd dur s mildi und sunige Klima bigünstigt. Im Wyland liget au historischi Baute, wie s Schloss Laufe am Rhiifall und s Chloster Rhiinau. De Tielekt vom Wyland ghört zu de Ostschwiizertielekt und underschaidet sich dütli vom Züritütsche.
