Yoga

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Halasana.jpg

De Yoga (Sanskrit: योग yoga m., yuj- "aspanne, aajoche, igschirre") isch aini vo de sechs klassische System i de indische Philosophii. De Patañjali het as erste i siim Yogasutra de Yoga systematisch dargstellt und beinhaltet ethischi Grundsätz, Körper- und Atemüebige, Zruggbinde vo de Gidanke und Meditation. Im Weste werd under Yoga maist nume de Hatha Yoga, bestehend us Körperhaltige und Atemüebige, gmaint und werd drum vo villne as Sportart oder Wellness bitribe, ooni oder nu mit gringem spirituellem Kontext. Zudem findet de Yoga au immer mee Aawendig i Therapie. E Maa, wo regelmässig und ernsthaft Yoga macht, werd Yogi oder Yogin (skt. yogī) gnennt und e Frau Yogini (skt. yoginī).

Gschicht[ändere | Quälltäxt bearbeite]

e Sigel us de Industalkultur

D Ursprüng vom Yoga liged im Dunkle. Aahand vo bildliche Darstellige uf Fundobjekt vo de Industalkultur werd erwoge, as d Wurzle vom Yoga vorarisch sind. I altindische Schrifte tauchet Zügnis öber de Yoga scho früe uuf, so i de Upanischade, im indische Nationalepos Mahabharata (6.Jh.v.Chr.) und i de Bhagavadgita.

De klassischi Yoga isch zerstmol vom Patañjali (2./4.Jh.n.Chr.) im Yogasutra bischribe wore und isch denn scho früe vo verschidnige Autore kommentiert wore.

De Yoga isch im 19. Jh. im Weste bikannt wore, het aber nu süüferli Fuess gfasst. Erst ab de sibezger Joor vom 20. Jh. het sich de Yoga afange mee uusbraite. Hüt erlebt er en regelrechte Boom.

Yogaforme[ändere | Quälltäxt bearbeite]

Astanga Yoga[ändere | Quälltäxt bearbeite]

de Shiva gelt as Herr vom Yoga

De Astanga Yoga (skt. aṣṭāṅgayoga »Achtglidrig Yoga«) isch im Yogasutra vom Patañjali erchlärt und bistoot us acht Schritt:

Moralischi Üebige
1) Yama (skt. यम yama »Selbstkontrolle«): 5 ethischi Grundsätz: Gwaltlosigkait, Wooret, Eerlichkait, Enthaltsamkait und Bsitzlosigkait. Si helfet em Yogi s Gwüsse rainige und stärched de Charakter.
2) Niyama (skt. नियम niyama »Regle, Iischränkig«): 5 Diszipline: Rainhait, Zfridehait, Askese, Selbststudium, Hiigoob a Gott. Si stärched d Selbsterkenntnis, d Moral und Disziplin vom Yogi.
Körperüebige
3) Asana (skt. आसन āsana »Sitz«): Körperstelige förderet d Konzentration und gaistigi Flexibilität, stärched d Gsundhait und d Widerstandschraft vom Yogi.
4) Pranayama (प्राणायाम prāṇāyāma »Atemregelig«): Atemregelig rainigt und harmonisiert d Energije im Körper und förderet d Konzentration
5) Pratyahara (skt. प्रत्याहार pratyāhāra »Entwönig«): s Zruggbinde vom Gaist het zur Folg, as de Gidankefluss biruigt werd.
Gaistigi Üebige
6) Dharana (skt. धारणा dhāraṇā): Konzentration dient um de Gedankegang völlig zum Stillstoo bringe und förderet s Loosloo vo Aahaftige.
7) Dhyana (skt. ध्यान dhyāna »Meditation«): Meditation, Versenkig. De Gaist isch nu endgültig ruig und Fride und Uusglichehait werdet gfestigt.
8) Samadhi (skt. समाधि samādhi »Sammlig, Versenkig«) bidüütet Erkenntnis und Bifraiijig.

Raja Yoga[ändere | Quälltäxt bearbeite]

De Raja Yoga (skt. राजयोग, rājayoga »Königliche Yoga«) folgt allne Schritt vom Astanga Yoga, lait aber mee Wert uf Gedankekontrolle, Zruggzüche vom Gaist und Meditation.

Bhakti Yoga[ändere | Quälltäxt bearbeite]

De Bhakti Yoga (skt. भक्ति योग, bhakti yoga »Yoga vo de Hiigoob«) werd i de Bhagavadgita uusfüerli bischribe. S Ziil isch as de Yogi sini Gidanke ständig uf Gott richtet. Zu de Praxis ghört s Singe vo Mantre und religiöse Lieder und s Tanze zu Eere vo Gott. De Bhakti Yoga wert intensiv vo de Hare Krishna uusgüebt.

Jñana Yoga[ändere | Quälltäxt bearbeite]

Im Jñana Yoga (skt. ज्ञानयोग, jñānayoga »Erchenntnisyoga«) werd de Gaist träniert dör s Studium vo hailige und philosophische Schrifte. S Ziil isch nöd e Aasammlig vo möglichst vill Wösse sonder s werd d Fähigkait vom Underschaide und s Erchenne vo de Wooret aagstrebt.

Hatha Yoga im Fraije

Hatha Yoga[ändere | Quälltäxt bearbeite]

De Hatha Yoga (skt. हठ योग, haṭha yoga »Chraft Yoga«) isch d Bischäftigung mitem Körper und em Atem, wo mit Asanas (Körperstellige), Pranayama (Atemregelig) und anderne Technike schafft. Er isch im 9. Jh.n.Chr. vom Matsyendra und sim Schüeler Goraksha entwickelt wore, indem si de klassischi Yoga mit tantrische Methode verbunde hend. Im Gegesatz zu de ältere Philosophie vom Hinduismus vernaint de Hatha Yoga de Körper nümm, sondern bruucht en wie de Tantra as Werchzüüg zur Erlösig. As erste het de Svatamarama (14.Jh.) verschidnigi Asanas bischribe. Noch de Öberliferig gits 8'400'000 Asana, wo de Gott Shiva för all Arte vo Lebewese ersune het. Aber nu 84 werdet as hervorragend för de Mensch bitrachtet und nu 32 saiet effizient. Hüt werdet öber hundert Asanas underrichtet, de B.K.S. Iyengar erchlärt i siim Buech 200 Asanas.

Kundalini Yoga[ändere | Quälltäxt bearbeite]

De Kundalini Yoga (skt. कुण्डलिनी योग kuṇḍalinī yoga »Yoga vo de Schlangechraft«) stoot nöch zum Tantra und sis Ziil isch s Uufwecke vo de Kundalini oder Schlangechraft. De Kundalini Yoga schafft miteme subtile Astralkörper, wo under anderem us sibe Hoptenergizentre oder Chakre bistoot und merere Energiikanäl. Do die Yogarichtig vill mit Symbol und Mantre schafft, isch e profundi Kenntnis vom Hinduismus wichtig. Die Yogaform schafft mit bsundrige Körperrainigunge, Atemreglig, Mantra, Mudra, Asana und Meditation.

Purna Yoga[ändere | Quälltäxt bearbeite]

De Purna Yoga (skt. pūrṇayoga »Volle Yoga«) oder Integrale Yoga werd nüme d Weltflucht sondern d Iibindig vom Yoga is Alltagslebe gförderet. De Uusdruck Integrale Yoga isch unabhängig vom Sri Aurobindo und vom Swami Sivananda gschaffe wore. De Integral Yoga isch e Noischöpfig usem Afang vom 20. Joorhundert und het Bistandtail us de westliche Kultur iibaut.

De Sri Aurobindo ninnt d Bhagavadgita as Grundlaag för sin Integrale Yoga. De Yogi söll mit Hiigoob sini Uufgoobe und Werch, Wort und Gidanke em Brahman (s Absoluti Aini) widme. Statt Bifraijig vom Körper söll de Yogi s Göttliche dör Meditation und Konzentration abehole und integriere, demit er sich und d Menschhait positiv witterentwicklet. De Hatha Yoga spillt bim Aurobindo kai Role.

De Swami Sivananda het di verschidnige Yogarichtige kombiniert: De Yogi söll zerscht mit Hatha und Kundalini Yoga sini Praxis afange und denn zum Raja Yoga öbergoo. Denebet söll er Bhakti Yoga und Jñana Yoga uusüebe. Am maiste Bitoonig aber lait er uf de Karma Yoga, won er as "Dienst a de Menschhait" düütet. S Helfe a andere Mensche bringt nochem Sivananda de Yogi am schnellste as Ziil.

BKS Iyengar

Moderni Yogaforme[ändere | Quälltäxt bearbeite]

D Verbraitig vom Yoga i di ganzi Welt und bsunders in Weste abem 20. Jh. het vili noiji Yogaforme förebroocht. Em bikannteste hüt isch de Iyengar-Yoga (sprich: Aijengarjooga), wo en bsunders strenge Hatha Yoga isch und de Körper starch is Zentrum stellt. De Bigründer isch de Südinder B.K.S. Iyengar (*1918), de vermuetli grööst Yogamaister vom 20. Joorhundert. De Inder Choudhury Bikram (*1946) het de Bikram Yoga bigründet: e festi Abfolg vo 26 Asana werd i ghaizte Rüüm döregfüert, wobi d Temperatur zwöschet 30 und 40˚C bitrait. Verbraitet isch au Yoga för Schwangeri, e sanfti Form vom Hatha Yoga wo d Schwangerschaft understützt und d Giburt vorbiraitet.

Pilates isch vom Tütsche Joseph Pilates (1880-1967) erfunde wore und leent sich an Hatha Yoga aa, isch aber vom klassische Yoga scho recht wiit ewegg. De Lachyoga (Hāsyayoga) isch ane 1995 vom indische Arzt Madan Kataria erfunde wore und het mit aigetlichem Yoga nünt z tue.

Büecher[ändere | Quälltäxt bearbeite]

Lueg au[ändere | Quälltäxt bearbeite]

 Allmänd (Commons): Yoga – Sammlig vo witere Multimediadateie