Vishnu-devananda

de Vishnu-devananda

De Swami Vishnu-devananda (*31. Dezember 1927 z Kannimangalam, Kerala, Indie; † 9. November 1993 Mangaluru, Karnata, Indie) isch en Yogamaister und ghört zu de Pioniere vom Yoga im Weste. Er isch au underem Name "de flügedi Swami" bikannt und isch e Schüeler vom Swami Sivananda gsii.

Chindhait und Sannyasin

De Vishnu-devananda isch am 31. Dezember 1927 as Soo vo riche Guetsbsitzer z Kannimangalam im südindische Staat Kerala uf d Welt choo. As junge Maa isch e i d Armee trete. E Flugblatt mit spirituelle Aalaitige vom Swami Sivananda, won er zuefällig gfunde het, het en biwoge wäred eme Urlaub uf Rishikesh z raise, um de Sivananda z treffe. Er het denn sini Militärlaufbaan ufgee und isch 1947 Sannyasin (Mönch) wore und denn en enge Schüeler vom Sivananda gsii. Er het ununderbroche Hatha-Yoga güebt und isch ann vo de grosse Maister i dere Disziplin wore und isch de erst Yogalehrer i de Sivananda Yoga Vedanta Forest Academy z Rishikesh gsii.

Ane 1957 het en de Sivananda in Weste gschickt, um dai de Yoga zunderrichte. Er isch uf Kanada und het z Montreal s Sivananda Yoga Vedanta Centre ggründet. Im Verlauf vo de Ziit het er z Amerika, z Europa und z Indie meriri Yogazentre gründet.

Fridesmissione

De Vishnu-devananda het sich aktiv för de Weltfride iigsetzt und isch immer wider miteme Flugi öber Chriegszone gfloge. 1971 isch er mitem Schauspiler Peter Sellers uf Belfast gfloge und e paar Mönet öber de Suez-Kanal. Er het Blueme und Flugblätter mit Fridesbotschafte abgworfe. Debi het er ununderbroche s Mantra: “Om Namo Narayanaya” gsunge. Sini Botsdchaft isch gsii: “De Mensch isch frai wiene Vogel. Öberwindet d Grenze mit Blueme und Liebi, nöd mit Gweer und Bombe!” 1983 isch er öber d Berliner Muur gfloge und z Ostberlin glandet. Nocheme churze Verhör isch er frai gloo wore und zrugg uf West-Berlin gschickt wore. 1984 isch er undem Motto “Yoga för de Fride” miteme Bus dör Indie graist, demit d Mensche vo sinere Haimet mite moderne Form vom Yoga vertraut werdet.

De Vishnu-devananda isch wäred ere Pilgerrais för de Weltfride am 9. November 1993 i de Chüstestadt Mangaluru (Karnata, Indie) gstorbe.

Werch uf Tüütsch

• Swami Vishnu-devananda: Das große illustrierte Yoga -Buch; Aurum-Verlag 2007. ISBN 978-3-89901-183-8
• Swami Vishnu-devananda: Meditation und Mantras; Reith 1997. ISBN 3-930716-02-X

Büecher

• Gopala Krishna: The Yogi – Portraits of Swami Vishnudevananda; Yes International publishers. ISBN 0-936663-12-X

Link

• Literatur vu un iber Vishnu-devananda im Katalog vu dr Dytsche Nationalbibliothek
• Sivananda Yoga Europe
• Sivananda Yoga international
• The Divine Life Society