Lachyoga

Us der alemannische Wikipedia, der freie Dialäkt-Enzyklopedy
Hops zue: Navigation, Suech

De Lachyoga (Hasya-Yoga oder au Yogalache) isch e moderni Form vom Yoga, wo mer aifach oni Grund lache tuet. Die Lachüebige werdet kombiniert mit Deen- und Atemüebige und Pantomimik, wo zum Lache areget. S Ziil vom Lachyoga isch, as de Mensch öber en afänglichs künstlichs Lache zumene echte Lache chunt, wo denn bifraie söll.

Ursprung und Entwicklig[ändere | Quälltäxt bearbeite]

D Technik vom Lachyoga isch vom Wüsseschaftsschurnalist Norman Cousins i Selbstversüech [1] oni Hilf vo Laborratte entwicklet worde. De indischi Arzt Madan Kataria vo Bombay het die Lachüebige vom Cousins mit traditionelle Yogaüebige kombiniert und denn 1995 de ersti Lachklub gründet. Hüt, im Joor 2007, gits me as 5000 derig [2], und d Lachyoga-Biwegig fiiret jede erst Sunntig im Mai de Weltlachtag.

Lache oni Grund[ändere | Quälltäxt bearbeite]

Bim Lachyoga tuet mer lache, oni as mer Witz bruucht, denn Theorii vom Kataria sait, as d Würkig vom Lache unabhängig vom Uuslööser isch. Drum bruucht mer nöd umbedingt Humor, um Lachyoga z träniere. Dodemit isch Lachyoga bsundrigs au för Lüt us nördliche Braitegraad gaignet. I de Gruppe bildet sich den sowiso e Dynamik, wo echts Lache ufchunt und sich verbraite tuet.

Würkig[ändere | Quälltäxt bearbeite]

D Verfechter vom Lachyoga erkläret miteme Lächle, ass de Lachyoga, well me nöd gliichzitig Lache und Denke chöni, e positivi Würkig uf de Gaist uusüebi und so, änlich wie d Meditation, zunere gaistige Entspanig füeri.

D Ergebnis vode Lachforschig oder Gelotologi seget, as Lache s Woolsii staigeret. Zudem werdet dor echts Lache Substanze aktiviert, wo entzüngigshemmend sind und Schmerz stilet, Stresshormönli werdet abbaut und s Immunsystem gstärcht. Zudem werd de Suurstoffuustuusch im Hirni stärcher, d Atmig verbesseret, de Herzchraislauf i Schwung broocht und ganz allgemain de Stoffwechsel agregt. Die Resultat sind umstritte, vermuetli stecket do e paar technokratischi Lachmuffel dehinter, denn jede wo gnueg lacht, waiss as Lache gsund isch.

Quele[ändere | Quälltäxt bearbeite]

  1. Dr. Michael Titze: Therapeutische Erfahrungen mit Lachen
  2. History Of Laughter Yoga

Büecher[ändere | Quälltäxt bearbeite]

  • Madan Kataria: Lachen ohne Grund (Laugh for no reason). Madhuri international, Mumbai, ISBN 3-928632-93-0

Weblinks[ändere | Quälltäxt bearbeite]

Dä Artikel basiert uff ere fräie Übersetzig vum Artikel „Lachyoga“ vu de dütsche Wikipedia.

E Liste vu de Autore un Versione isch do z finde.