Sabine Dahinden

d Sabine Dahinden (2014)

D Sabine Dahinden (* 14. Augschte 1968 z Altdorf) isch e Schwyzer Färnsehmoderatori.

Syter anne 1995 schafft si bim Schwyzer Färnseh, zurzyt isch si dert Moderatori un Redakteeri vu dr Sändig Schweiz aktuell.

Lääbe

Im Johr 1988 het d Sabine Dahinden ihri Matura Typus B am Kollegium Karl Borromäus (Kantonsschuel Üri) z Altdorf gmacht. Derno het si an dr Universitet Bärn Germanischtik studiert. Si het s Studium (dytschi Literatur- un Kulturgschicht, Franzesisch, Gschicht) 1994 mit em Sekundarlehrerpatänt abgschlosse (Master of Education). Vu 1994 bis 1995 het si as Redakteeri/Reporteri bi Radio Sunshine im Kanton Zug gschafft.

Anne 1995 het d Sabine Dahinden ihri Arbet eim Schwyzer Färnseh aagfangen as Moderatori un Redakteeri vu dr Sändig TAF (Tagesfernsehen). 1998 isch si as Stagiaire in d Redaktion vu Schweiz aktuell gwächslet, wu sie im Juni 2000 au Reporteri un Redakteeri woren isch. Syt Meerz 2001 isch si derzue au Moderatori vu dr Sändig. Im Johr 2008 het si ne churze Moderationsuusdausch mit em ORF gmacht un isch dert e baar Mol bi «Wien heute» ufdrätte.

Näbe uuzellige dagesaktuälle Liveschaltigen in dr ganze Schwyz un Reportasche het si verschideni mehstindigi Livesändige vum Schwyzer Färnseh moderiert. Syter anne 2011 het si au ne aigeni SRF-Summerserie mit Themen un Dräffen in dr Schweiz. Am 8. Mai 2016 het d Sabine Dahinden dr Prix Walo in dr Sparte Publikumsliebling gwunne. Si moderiert regelmäßig speziälli Aaless im Ufdrag vu Stiftige, schrybt Kolumnen un Rede un dritt bi Läsigen uf.

Privats

D Sabine Dahinden isch syt em Septämber 2010 ghyrote mit em Härzchirurg un Universitätsprofessor Thierry Carrel. Dervor isch si ghyrote gsii mit em Flavien Allenspach. D Dahinden un dr Carrel wohne zäme z Bärn.

Weblink

• d Sabine Dahinden bim Schwizer Färnseh
• Publikazione vo und über d Sabine Dahinden (Site cha nüme abgrüeft wärde; Suche im Webarchiv)[1] [2] Vorlage:Toter Link/www.helveticat.ch im Katalog Helveticat vu dr Schwyzerische Nationalbibliothek

Fueßnote

Dä Artikel basiert uff ere fräie Übersetzig vu dere Version vum Artikel „Sabine_Dahinden“ vu de dütsche Wikipedia. E Liste vu de Autore un Versione isch do z finde.