Royal Opera House

Us der alemannische Wikipedia, der freie Dialäkt-Enzyklopedy
Hops zue: Navigation, Suech
S Royal Opera House
D Paul Hamlyn Hall vom Royal Opera House
Inneaasicht vom Theater vor em Brand vo 1808

S Royal Opera House z Covent Garden, London, isch s bedütendste britische Operehuus. Dört si die Royal Opera und s Royal Ballet dehäi.

Gschicht[ändere | Quälltäxt bearbeite]

S erste Theatergeböid an däm Blatz, s domoolig Theatre Royal isch vom Edward Shepherd entworfe worde. Es isch am 7. Dezämber 1732 mit ere Uffüerig von William Congreve sim The way of the world eröffnet worde. Zwaar si scho vo 1735 au Opere, zum Bischbil vom Händel, dört ufgfüert worde, es isch aber doch hauptsächlig e Schauspiilhuus gsi.

1808 isch s Geböid zerstöört worde und dr Archidekt Robert Smirke het dr Ufdraag überchoo es wider ufzbaue. E Joor spööter, am 18. Septämber 1809 isch s mit ere Uffüerig vo Macbeth widereröffnet worde. Spööter si nid nume Theaterstück sondern au Opere und Ballett zäigt worde.

1846 isch dr Dirigänt Michael Costa zum Theatre Royal choo und mit iim isch fast si ganzi Operekompanii do aane züüglet. Dr Inneruum vom Theater isch vom Benedetto Albano ganz umbaut worde. Schliesslig het mä s Huus as königlichi Italiänischi Opere mit em Gioacchino Rossini sinere Semiramide widereröffnet.

Am 5. Merz 1856 isch s Geböid wider aabebrennt. Es het Schwiirigkäite bi dr Finanzierig gee und dorum isch s Theater erst am 15. Mai 1858 wider baraat gsi.

1892 isch s Huus offiziell zum Royal Opera House worde. Mä het s Repertuar die ganz Zit erwiteret. Wenn nid Säsong gsi isch, isch s Huus äntwääder zue gsi oder mä het Film vorgfüert oder Cabaret zäigt. Wääred em Erste Wältchrieg het mä s Geböid as Laagerruum brucht. Im Zwäite Wältchrieg het s dört Danztee gee.

Wo dr Chrieg ume gsi isch, het mä dr David Webster zum Generaldiräkter vom Huus ernennt und mä het em Sadler’s Wells Ballet under dr Läitig vo dr Ninette de Valois s Huus as permanänti Häimet aabote. D Widereröffing het am 20. Februar 1946 mit ere Ufführig vom Dornröösli stattgfunde.

Vo 1996 bis 2000 isch s Geböid saniert und erwiteret worde. In deere Zit isch s Huus zue gsi.

Sit 2007 wärde jedes Joor im Februar im Royal Opera House die British Academy Film Awards vergee.

Trivia[ändere | Quälltäxt bearbeite]

So wie s s Operehuus verzelt, sige die beste Blätz in dr zäänte Reije. Es handli sich um d Blätz 7, 14, 15, 16 und 26, wo im Parkett vo dr Reije K si.[1]

Weblingg[ändere | Quälltäxt bearbeite]

 Allmänd (Commons): Royal Opera House – Sammlig vo witere Multimediadateie

Fuessnoote[ändere | Quälltäxt bearbeite]

  1. Der perfekte Plan. Artikel im SZ-Magazin, Nr. 14/2009, S. 40

{{Coordinate |NS=51/30/46/N |EW=0/7/21/W |type=landmark |region=GB-WSM}

Dä Artikel basiert uff ere fräie Übersetzig vum Artikel „Royal_Opera_House“ vu de dütsche Wikipedia.

E Liste vu de Autore un Versione isch do z finde.