Regenwald

Us der alemannische Wikipedia, der freie Dialäkt-Enzyklopedy
Tropische Rägewald z Amazonie, Brasilie
Tämperierte Rägewald z Tasmanie

Rägewald nännt mer e mee oder weniger naturbelosse Wald-Ekosyschtem, wu dur e bsundersch fycht Klima gchännzaichnet isch mit Niderschleg vu iber 2000 mm im Johresmittel. Mer unterschaidet doderby zwische dr Rägewälder in dr Trope un dr Rägewälder vu dr gmäßigte Braitine.

Tropischi Rägewälder[ändere | Quälltäxt bearbeite]

Immergrieni, tropischi Rägewälder sin uf allne Kontinänt entstande, uf bod Syte vum Äquator bis uugfehr zum 10. Braitegrad, vor allem z Sidamerika un z Ozeanie aber au dytli driber uuse. Di grescht zämmehängigi Flechi – glychzytig au iber d Helfti vu dr Gsamtflechi vu allne tropische Rägewälder – het s im Beraich vum Amazonasbecki. Wyteri großi Rägewälder git s im Kongobecki un z Indonesie.

Dr Uusdruck tropische Rägewald chännzaichnet e Ekosyschtem, wu ne Vilzahl vu Waldtype umfasst: zum aine dr Diefland-Rägewald bis um 800 m Hechi, zum andere dr Bärg-Rägewald bis um 1500 m Hechi un schließli dr Näbelwald iber 2000 m Hechi. Zum Dail wäre in dr Fachliteratur fir bstimmti Regione no mee Unterschaidige vorgnuu, zum Byschpel "Wulkewald" fir dr Rucke vu dr Nerdlige Kischtekordillere z Venezuela.

Rägewälder vu dr gmäßigte Braitine[ändere | Quälltäxt bearbeite]

Gmäßigte Rägewald chunnt vor allem an dr Weschtkischte vu Nordamerika vor, z Chile un uf Tasmanie un z Neuseeland. Vum tropische Rägewald wird er dur syni Lag in dr gmäßigte Zone abgränzt.

Literatur[ändere | Quälltäxt bearbeite]

  • Anton Fischer: Forstliche Vegetationskunde. Blackwell, Berlin, Wien 1995, ISBN 3-8263-3061-7.

Weblink[ändere | Quälltäxt bearbeite]

 Commons: Rägewald – Sammlig vo Multimediadateie
Dä Artikel basiert uff ere fräie Übersetzig vu dere Version vum Artikel „Regenwald“ vu de dütsche Wikipedia. E Liste vu de Autore un Versione isch do z finde.