Niederdorf (Stadt Zürich)

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Blick uf d'Limät und s'Dörfli
S'Zunfthuus zur Schimdä im Dörfli

S'Dörfli odär's Niderdorf (uf Hochtüütsch Niederdorf) isch s'Viärtäl rund um d'Nidärdorfstrass i dä Altstadt vo Züri.

Uusdeenig[ändere | Quälltäxt bearbeite]

S'Döfli hät d'Form vomäne spitzwinklige Drüüegg. D'Spitzä liit im Norde am Cäntral. Di öschtlichi Gränzä bildät d'Limät beziänigswys s'Limmätquai, d'Weschtgränze dä Säilergrabe, wo zur alte Stadtbefeschtigung ghört hät. D'Südgränze isch nöd ganz klar definiärt. Si entspricht ungfäär änäre Linie vom Noimärt über's Grossmünschter bis zur Wasserchile. Südlich vom Niderdorf befindät sich's Oberdorf. Oft wird d'Bezäichnig Dörfli au für di gsamt Altstadt öschtlich vo dä Limmät das häisst s'äigätlichi Dörfli plus s'Raatshuusquartier und s'Oberdorf bis zum Bellvue bruucht. S'äigätlich Herz vom Dörfli bildät dä Hirschäplatz, wo alljährlich am 11.11. am 11.11 au s'Monschtärkonzert vo dä Fasnacht startät.

Öschtlich vom Dörfli uf äm Weschthang vom Züriberg liged d'Uni und d'ETH, wo vom Dörfli uus mit äm Polybähnli, änäre Standsäilbaan erräicht werdä cha. Drum isch s'Dörfli au bi dä Zürcher Schtudänte seer beliäbt.

Vercheer[ändere | Quälltäxt bearbeite]

S'ganz Quartier isch äi grossi Fuässgängerzoone mit Uusnaam vom nördliche Täil vom Limmätquai, dä Mühligass, dä Zähringerstrass und äm Zäringerplatz sowie natürli äm Säilergrabe. Uf äm Limmätquai vercheeräd s'Viäri- und s'Füfzäni-Tram, uf äm Säilergrabe dä Drüüer und dä Einedrysgi-Trolleybus, wo früäner ä Mal s'Tram Numärä Äis gsy isch.

Strassakafi und Nachtläbe[ändere | Quälltäxt bearbeite]

S'Dörfli isch vor alläm wäge sini ville Strassekafis, Kabaretts und Nachtklüb beliäbt. Früäner isch's Dörfli als Zäntrum vom Zürcher Strassestrich berüchtigt gsy, aber sit dä 80är-Jaar hät sich s'Miliö mee und mee a s'Sihlquai und a d'Langstrass verlagärät.

D'Zürcher Zentralbiblioteek[ändere | Quälltäxt bearbeite]

Am Predigerplatz zmitzt im Dörfli befindät sich i dä Rümlichkäite vom früänäre Chloschter zum Prediger d'Zürcher Zentralbiblioteek, wo gmäinsam vom Kanton, dä ETH und dä Uni betribe wird. Di ehemaligi Chloschterchile diänt wyterhin als Gotteshuus.

Luäg au[ändere | Quälltäxt bearbeite]

Weblink[ändere | Quälltäxt bearbeite]

 Allmänd (Commons): S'Dörfli – Sammlig vo witere Multimediadateie