Narses

Us der alemannische Wikipedia, der freie Dialäkt-Enzyklopedy
Hops zue: Navigation, Suech

Dr Narses (griechisch Ναρσής; * um 490; † 574 z Rom) isch en Öinuch und General vom oströmische Kaiser Justinian gsi.

Lääbe[ändere | Quälltäxt bearbeite]

Dr Narses isch us em sogenannte Persarmenie cho, also däm Däil vo Armenie, wo vo de Sassanide bsetzt gsi isch. Dört isch d Kastrazioon im Geegesatz zum Oströmische Riich erlaubt gsi und dr Narses isch kastriert worde. Er isch spööter uf Konstantinopel gange und isch under em Justinian I. primicerius sacri cubiculi, d.h. e Verwalter vo de kaiserlige Finanze, worde. Wäärend em Nika-Ufstand 532 het er s Verdraue vom Kaiser und vo siner Frau Theodora erworbe. 538 isch er as Zivilist mit ere Armee uf Italie gange, wo dr magister militum Belisar sit 535 d Ostgoote bekämpft het. Die bäide Fäldheere si aber nid uschoo zämme, dorum het mä dr Narses zrugggrüeft, und dr Belisar het 540 Ravenna erooberet. Es het bis 541 Friide gherrscht, bis d Goote under em nöije Köönig Totila wider häi afo kämpfe. Wo s im Belisar nid glunge isch, für Rue z sorge, isch dr Narses 551 zum Oberbefäälshaaber vo de kaiserligen Drubbe in Italie ernennt worde. Er het im Summer 552 d Ostgoote uf de Busta Gallorum (in dr Nööchi vo Gualdo Tadino z Umbrie) und im Herbst am Mons Lactarius (hüte Monte Angelo zwüsche Neapel und Salerno) vernichdend gschlaage. Dr Totila isch in dr erste Schlacht umchoo, si Noochfolger Teja in dr zwäite. D Ostgoote häi d Germane nördlig vo de Alpe um Hilf bittet und en alemannisch-fränkischi Armee under em Butilinus isch in Italie iigfalle. Dr Narses het sä im Herbst 554 in ere entschäidende Schlacht am Casilinus vernichdet. Er isch in de Joor druf in Italie bliibe, het dr Widerufbau vo dr Infrastruktuur gläitet und die oströmisch Herrschaft über s Land konsolidiert.

Am Aafang vo 568 het en dr nöiji Kaiser Justin II. abgsetzt und zrugggrüeft; er isch aber z Italie bliibe, won er 574 as alte Maa gstorbe isch.

Liddratuur[ändere | Quälltäxt bearbeite]

  • Neil Christie: Invasion or invitation? The Lombard occupation of Northern Italy. In: Romanobarbarica 11, 1991, S. 79–108.
  • Adolf Lippold: Narses 13a). In: Paulys Realencyclopädie der classischen Altertumswissenschaft (RE). Supplementband XII, Stuttgart 1970, Sp. 870–889.
  • John R. Martindale: The Prosopography of the Later Roman Empire IIIb. Cambridge 1992, S. 912–928, ISBN 0-521-20160-8.
Dä Artikel basiert uff ere fräie Übersetzig vu dere Version vum Artikel „Narses“ vu de dütsche Wikipedia.

E Liste vu de Autore un Versione isch do z finde.