Meinrad von Einsiedeln
| Dialäkt: Züridütsch (See) |
De Meinrad vo Einsidle OSB (* um 797 bi Rotteburg (Württeberg); † 21. Januar 861 in Einsidle) isch en Eremit gsii und gilt hüt i de katholische Chile als Heilige. Uf ihn gaat d Gründig vom Chloschter Einsidle zrugg.
De Meinrad (uursprünglich Meginrat[1]), dr Legende naa us dr Familie vo de Grafe vo Hohezollere, isch a dr Chloschterschuel vo dr Benediktinerabtei Riichenau im Bodesee vo de Äbt Haito und Erlebald underrichtet worde. Er isch öpe 25 Johr alt gsi, woner in Orde iiträte und Mönch worde isch. Noch a paar Johr uf de Riichenau und i dr aagschlossne Priorei vo Babinchowa, bim hütige Bänke, damols am obere Zürisee, hät er sich für es eremitischs Läbe entschlosse und hät sich 828 a d Häng vom Etzel zruggzoge. Er hät e wundertätigi Figur vo de Muettergottes, wo ihm d Äbtissin Hildegard vo Züri gschänkt hät, mit sich träit. Im Jahr 835 isch er vom Etzelpass ewegg und wyter in 'Finschtre Wald' ine zoge. Er söll a däre Schtell, wo hüt d Gnadekapelle i dr Chloschterchile vom Chloschter Einsidle schtaht, e Klause und e Kapelle baut haa, zum i dr Einsidelei Gott z diene (drum dr Ortsname Einsidle).
Dr Saag naa isch dr Meinrad am 21. Januar 861 vo zwei Landschtriicher erschlage worde, wo d Schätz wöle händ, wo im Heiligtum vo gläubige Pilger anegleit worde sind. Druufhii sölled zwee Raabe d Mörder bis uf Züri verfolgt haa und so händ die zwee Röiber vor Gricht gfüehrt wärde chöne. Us dem Grund sind uf em Eisidler Chloschter- und Dorf-Wappe zwee Raabe abbildet.
Während de folgende achtzg Johr isch d Klause nie ohni eine oder mehreri Einsidler gsii, wo em Biischpiil vom Meinrad gfolgt sind. Eine vo ihne, de Eberhard, vorher Probscht vo Strassburg, hät es Chloschter und e Chile baue loo. Er isch denn au dr erschti Abt vo dem Chloschter worde.
[ändere] Weblinks
Allmänd (Commons): Heilige Meinrad — Witeri Mulitimediadateie zum Artikel
- Artikel Meinrad im Historische Lexikon vo dr Schwiiz
- Ytrag (inkl. Literaturaagabe) im Biographisch-Bibliographische Kirchelexikon (BBKL)
- Gschicht vom Chloschter Einsidle
[ändere] Einzelnochwiis
| Persoonedaate | |
|---|---|
| NAME: | Meinrad vu Einsidle |
| ALTERNATIVNAMEN: | |
| KURZBESCHREIBUNG: | Eremit, uf ihn gaat d Gründig vom Chloschter Einsidle zrugg |
| GEBURTSDATUM: | um 797 |
| GEBURTSORT: | bei Rotteburg |
| STERBEDATUM: | 21. Januar 861 |
| STERBEORT: | Einsidle |
Dr Artikel basiert uf 'ra freie Ibersetzung vum Artikel „Meinrad von Einsiedeln“ us dr dytsche Wikipedia.
E Lischte mit de dörtige Autore kasch dörte aluege
