Ludwig Kilchmann

Dr Ludwig Kilchmann (* öbbe 1450 villicht z Baasel, † 1518 z Baasel isch e Baasler Gschäftsmaa und Politiker gsi.

Lääbe

Familie

D Kilchmanns si im 15. Joorhundert e Schulthäissegschlächt z Mellinge gsi. In dr Middi vom 15. Joorhundert si e Däil von ene uf Baasel gange. Z Mellinge isch d Familie um 1500 usgstorbe.

Dr Ludwig Kilchmann isch as Soon vom Beckermäister und Rootsherr Conrad Kilchmann uf d Wält choo. Er het d Elisabeth Zscheckebürlin († 1499), d Dochder vom Rootsherr und Ooberstzumftmäister Hans Zscheckebürlin ghürootet. Dr spööter Oberstzumftmäister Hans Kilchmann, wo no vor 1470 uf d Wält choo isch, isch woorschinlig si Soon gsi. Spööter häi d Kilchmanns non e Dochder gha, d Margreth. Dr Oberstzumftmäister und Baasler Bürgermäister Peter Offeburg isch mit em Kilchmann sinere Schwöster in zwäiter Ee verhürootet gsi.

Politik

Dr Ludwig Kilchmann isch in zwäi Zümft zümftig gsi. 1476 isch er Chriegsroot vom Baasler Ufkomme gsi, wo as Däil vo dr Niidere Veräinigung bi dr Schlacht bi Murte an dr Site vo de Äidgenosse gege d Burgunder kämpft het. Vo 1491 bis 1499 und wider vo 1502 bis 1518 isch er Rootsher vo dr Hooche Stuube gsi. 1500 isch er für e Joor Drizääner (Ghäime Staatsroot) und Statthalter vom Bürgermäisteramt gsi, wil denn vo Gsetz us nume Aadligi häi chönne Bürgermäister wärde. Er isch as Nüüner für milidäärischi Aagläägehäite verantwortlig gsi, as Siibner in dr Finanzkommission vom Baasler Root und as Dreier im Finanzusschuss gsässe. Er isch Grichts- und Fümferher gsi. As Gsandte vo Baasel isch er vil in dr Umgääbig vo dr Stadt und de Underdäänegebiet underwägs gsi.

Wirtschaftligi Karriere

1481 isch er stille Däilhaber von ere Handelsgsellschaft worde, wo zwäi Schwööger Zscheckebürlin und non e andere betriibe häi und wo mit Duech und Spezereie ghandlet het. Si Däil het er denn 1494, wo sini Schwööger dood gsi si, an dr dritt Kompanion verkauft. Wo 1484 si Schwiigermueter gstorbe isch, häi d Kilchmanns e bedütende Däil an de Bärgwärk vo Plancher-les-Mines, Masmünster und Todtnau gerbt.

Religioon

Dr Kilchmann het 1485 e Joorzit für sich, für sini Eltere, si Soon und si Brueder Friedrich in dr Pfarrkiirche St. Theodor gstifdet. Er het Schänkige an d Kartause gmacht, wo denn 1487 si Schwooger Hieronymus iidräte isch. Us em Joor 1485 stammt au e Stifdig von ere Joorzit für sich sälber und si Frau im Stäineklooster. Öbbe 1501 het er e Wallfaart uf Aache gmacht und isch vo dört d Mäss z Antwärpe go bsueche. 1502 häi dr Ludwig und si Soon Hans in iire Testamänt us em Familiestammhuus e Pilgerherbärg gmacht.

Kwelle

Samuel Schüpbach-Guggenbühl: Kilchmann, Ludwig. In: Historisches Lexikon vo dr Schwiiz.
Ludwig Kilchmann (Site cha nüme abgrüeft wärde; Suche im Webarchiv)[1] [2] uf dr Website vo dr Freije Uniwersidäät Berlin, abgrüeft am 7. Mai 2016