Chile mit* de Froue

Us der alemannische Wikipedia, der freie Dialäkt-Enzyklopedy
s Logo vom Projekt «Chile mit* de Froue» düted mit de zwee Farbe d Mehrdütigkait vom Projekt aa

Chile mit* de Froue (dütsch; Kirche mit* den Frauen, französisch; Église avec* les femmes, italienisch; Chiesa con* le donne, rätoromanisch; Baselgia cun* las dunnas) isch de Name vo me chirchliche Projekt, wo sich för es Mitenand vo Manne und Froue uf allne Ebene, för e gschwüschterlechi und dialogeschi Chile iisetzt. De chli Stärn im Name hät zwee Bedütige. Es goht ainersits nöd nu um d Emanzipazion vo de Froue, sondern um grundsätzlichi Gliichberächtigung – es chönnt au haisse «Chile mit de Arme». Anderersits isch de Stärn es Asteriskus, wo, wie bim bäte vo de Psalme, e chlinni Verschnuufpause bedüted.[1]

Arbets- und Pilgergruppe[ändere | Quälltäxt bearbeite]

S Projekt isch aafangs 2014 entstande mit ere Arbetsgruppe, wo us föf Froue und drü Manne bestande hät. S Motto isch gsii; «Mör nemid 1'000 Kilometer Wäg under d Füess – för e Chile mit de Fraue. För Gliichhait im Glaube und im Tue.»[2] D Pilgergruppe, wo sich uf de Wäg uf Rom gmacht hät, isch aafänglich us acht Froue und am Maa zämegsetzt gsii. Ab Assisi isch dänn au no d Priorin vom Chloschter Fahr bi dä Pilgergruppe debii.[1]

Pilgerwäg[ändere | Quälltäxt bearbeite]

Am Mäntig 2. Mai 2016 isch d Pilgergruppe noch eme Gottesdienscht i de Kathedrale vo Sanggalle uf eren Wäg uf Rom gstarted.[3][4] De Starttag isch de Gedänktag vo de sanggaller hailige Wiborada, di erscht Frou, wo vo me Papst hailiggsproche worden isch, und de Aakumftstag z Rom, de 2. Juli, isch s Fäscht «Mariä Heimsuchung», wo gmäss em Evangelium vom Lukas di schwanger Maria ehrer Verwandte Elisabet di froh Botschaft öberbringt.[5] D Pilgergruppe wött a däm Tag im Vatikan em Papst Franziskus ehri Botschaft öberbringe.

Underwägs send je noch Etappe mit de Chärngruppe au no anderi Pilger mitgloffe, zum Tail meh as hundert.[6] Am 15. Juni isch d Pilgergruppe z Assisi aacho und hät sich drü Täg e Pause gönnt.[7] Am 28. Juni isch d Pilgergruppe z Labaro gstarted, eme Ussequartier vo Rom, und isch em Tiber entlang i richtig Innestadt glaufe. Dodebii isch si von ere Gruppe beglaited wore, wo mit em Car aagraisst isch und vom Schwizer Frouebund organisiert worden isch.[8] Am 2. Juli isch de sogenannti «Pilgertag in Rom» gsii, wo no mee Gruppene, under anderem aini us em Bistum Sanggalle, und Ainzelpilger us de Schwiz und anderne Länder mit de Chärngruppe vo de Piazza del Popolo via Santa Maria sopra Minerva (gad i de Nöchi vom Pantheon) zum Petersplatz und in Petersdom im Vatikan glaufe sind. Es sind au d Bischöf vo Basel, Sanggalle und Graz, de Abt vo Aisidle und anderi Ordenslüt mitpilgered.[9] Bi de baide erste Stazione isch jewile en Aadacht ghalte wore, im Petersdom dänn en Gottesdienst, wo d Aalige, wo uf em Wäg uf Rom gsammlet wore sind, mit em „Brief an Papst Franziskus“[10] in ere Schachtle stellverträttend em Sanggaller Bischof öbergee wore sind. Am 26. November 2016 hät dänn de Pater Mauro Jöhri, as dozmolige Präsident vo de wältwite Union vo de Ordensobere, d Post us Sanggale em Papst am Rand von ere Audienz chöne öbergee.[11]

Weblink[ändere | Quälltäxt bearbeite]

Fuessnoote[ändere | Quälltäxt bearbeite]

  1. 1,0 1,1 Nonnen machen sich für mehr Frauenrechte stark Artikel im Tagi vom 11. April 2016
  2. Startsite (Memento vom 26. Juni 2016 im Internet Archive) vom Projekt Kirche mit* den Frauen abgruefen am 24. Juni 2016
  3. Pilgern für die Sache der katholischen Frau SRF 1, Tagesschau vom 2. Mai 2016
  4. Pilgerschaft «Kirche mit den Frauen» ist gestartet: «Damit uns Männern die Augen aufgehen» kath.ch, Artikel vom 2. Mai 2016
  5. «Überall gehen Knospen auf» - Priorin Irene hofft auf den weiblichen Frühling in der katholischen Kirche Limmattaler Zitig, Artikel vom 30. März 2016
  6. Zwischenziel erreicht: Über 1000 Menschen begleiten Pilgerinnen nach Rom kath.ch, Mediemittailig vom 17. Mai 2016
  7. Kirche mit* den Frauen – in Assisi angekommen franziskanische-gemeinschaft.ch, Artikel vom 16. Mai 2016
  8. Spontanes Mitpilgern (Memento vom 13. Februar 2016 im Internet Archive) uf de Website kirche-mit.ch, abgruefen am 27. Juni 2016
  9. Programm des Pilgertags in Rom am 2. Juli 2016 (Site cha nüme abgrüeft wärde; Suche im Webarchiv)[1] [2] Vorlage:Toter Link/www.kirche-mit.ch uf de Website kirche-mit.ch, abgruefen am 27. Juni 2016
  10. Brief an Papst Franziskus (Site cha nüme abgrüeft wärde; Suche im Webarchiv)[3] [4] Vorlage:Toter Link/www.kirche-mit.ch uf kirche-mit.ch vom 2. Juli 2016
  11. Nicht mehr ohne die Frauen Artikel uf kath-kirche-vorarlberg.at vom 9. Februar 2017