Irene von Athen

Us der alemannische Wikipedia, der freie Dialäkt-Enzyklopedy
E Solidus vo dr Irene

D Irene vo Athen (middelgriech. Irini i Athinea Εἰρήνη ἡ Αθηναία, * 752 z Athen; † 9. August 803 uf Lesbos) isch vo 797 bis 802 Kaiserin vom Byzantinische Riich gsi.

769 het si dr Leo IV. ghürootet, wo 775 Kaiser worde isch. E Joor druf het si e Soon uf d Wält brocht, dr spööteri Konstantin VI.

Noch em Dood vom Leo 780 isch dr Konstantin Chindkaiser und d Irene Mitregäntin gsi bis er volljöörig worden isch. Bevor er dr Droon het chönne bestiige, het er aber no bis zum ene Ufstand vo armenische Soldate in dr byzantinische Armee gege d Irene im Joor 790 müesse warte. D Irene het iire Kaiserinneditel bhalte, und dr Konstantin het zerst die ufständische Soldate müesse schloo, bevor si das akzeptiert häi. Denn het er en Ufstand vo si Brueder Nikephoros müesst underdrucke, wo mä in e Chloster gsteckt gha het, zum en draa z hindere, z leere wie mä regiert. Im Joor 797 isch non e Rebellioon usbroche, dasmol sis Verbündeti vo dr Irene gsi und si het sä au understützt. Mä het dr Konstantin gfange gnoo und bländet und er isch spööter 797 an sine Wunde gstorbe. D Irene het vo denn aa as Basilissa alli Gwalt über s Riich ghaa. und isch die ersti Frau im byzantinische Riich worde, wo elläi gherrscht het.

As Kaiserin het si nit grad vil Erfolg ghaa, d Armee het sä nume halbhärzig understützt, und d Minister häi zämme ghändlet. D Irene het d Stüüre gsänkt, zum mee Popularidäät überchoo, das het ere aber nume finanzielle Schwierigkäite gmacht.

Dr Irene iiri Regierigszit isch zmitzt in d Zit vom Byzantinische Bilderstrit im 8. und 9. Joorhundertgfalle. Si het zur Bardei vo de Ikonodule (de Bildervereerer) ghöört und het 787 s Zwäite Konzil vo Nicäa iiberüeft, wo under anderem entschiide het, ass mä döfi Ikone eere, aber nit aabäte.

Wil si as Frau aber Kaiserin gsi isch, si nöiji Brobleem entstande: Under em römische Rächt het kä Frau s Oberkommando über d Armee chönne füere. Wil dr Kaiser die Posizioon vo sim Amt us ghaa het, het e Frau legal nid chönne Kaiser si. Es git Kwelle wo sääge, ass wäge däm dr Babst Leo III. dr römisch Kaiserdroon as vakant aagluegt het und und dr Karl dr Groossi im Joor 800 zum römische Kaiser kröönt het. Mit dere Ernöijerig vom weströmische Kaiserdum het s oströmische offiziell für die westligi Wält nüt me bedütet.

Noch em Theophanes het dr Karl noch dr Kaiserchröönig vorghaa, d Irene z hüroote, zum si Kaiserdum au im Oste z legitimisiere. Es isch aber nid drzue choo, u. a. wil d Irene 802 abgsetzt und dur e Finanzminister Nikephoros ersetzt worde isch. Das isch s Ändi vo dr sürische Dünastii gsi. Dr Michael I. het denn 812 im Karl si Kaiserditel anerkennt.

D Irene isch 803 im Exil uf Lesbos gstorbe.

Liddratuur[ändere | Quälltäxt bearbeite]

  • Leslie Brubaker, John F. Haldon: Byzantium in the Iconoclast era. c. 680–850. A History. Cambridge University Press, Cambridge u. a. 2011, ISBN 978-0-521-43093-7.

Weblingg[ändere | Quälltäxt bearbeite]

 Commons: Irene – Sammlig vo Multimediadateie
Dä Artikel basiert uff ere fräie Übersetzig vum Artikel „Irene_von_Athen“ vu de dütsche Wikipedia. E Liste vu de Autore un Versione isch do z finde.