Haibärg

Albhochfläch uf m Haibärg

Dr Haibärg (amtl. Großer Heuberg odr bloß Heuberg) isch a denn bsiedelte Hochfläch uf dr Schwäbischa Alb. Är isch dr heischte ond sid-wäschtlichschte Doal vo dr Schwäbischa Alb. Dr heischt Bärg isch dr Lemberg mit 1.015 m ü. NHN. Sein Nama verdankt dr Haibärg em Hai, wo det doba vo bsonders guater Qualität sei soll ond dees bis huit no s Landschaftsbild uff'm Haibärg prägt.

Bsiedlong

Sälle Gmoanda keeret zom graußa Haibärg:

Kreis Duttlenga: Bärenthal (Bäradal), Böttingen (Bettenga), Bubsheim (Bubsa), Egesheim (Egesa), Gosheim (Gausa), Irndorf, Kolbingen (Kolbenga), Königsheim (Kingsa), Reichenbach am Heuberg (Reichabach), Renquishausen, Wehingen (Wähenga), Mahlstetten (Mohlstetta)

Kreis Semmerenga: Leibertingen (Leiberdenga), Schwenningen (Schwenenga), Stetten am kalten Markt (Schtetta)

Zollera-Albkrais: Meßstetten (Meschtetta, mit da Oartsdoal Hoaschdetta, Harta, Hossenga, Direnga, Oberdigasa, Ontrdigasa), Nusplingen (Nuschplenga), Obernheim (Oberna)

Dialäkt

Dr Haibärg keert zom schwäbischa Sprochraum. Är leit a dr Grenz zom Niederallemanischa. So sait ma zom Beispiel uf am eschtlicha Haibärg "du hoscht", "Sonna" ond "gsei" während ma em Wäschta "du häscht", "Sunna" ond "gsi" sait.

Gschiicht

Bis afang vom 20. Johrhondert isch dr Haibärg one vo da eermschta Regiona z Deitschland gsei. Mit em Bau vom Lochapass ond dr Haibärgbah hät sich dees genderet. Ee da 1920er Johr häts uf am Haibärg a Wiirtschaftswonder gea, wo vill kleine ond mittelständische Onternehma grendet worra send.