S blaui Wunder

Us der alemannische Wikipedia, der freie Dialäkt-Enzyklopedy

S blaui Wunder (schriftdütsch: Das blaue Wunder; rumantsch: il miracul blau) isch en Aktion vom Bündner Ernst Bromeis, wo zum Ziil het, de Wärt vom Element "Wasser" z verdütliche und di verschidnige Intresse am Wasser uf ein Nenner z bringe.


D Idee[ändere | Quälltäxt bearbeite]

Mit em blaue Wunder wot de Initiator de Mönsche es Gschpüri für di Einzigartigkeit vom Wasser gäh. Wasser, wo-n-es unverzichtbars Nahrigsmittel isch, für d Energiigwinnig bruucht wird, für Schport und Tourismus. All di Interesse sotte, zämme mit de Ökologie, fürenand Verschtändnis ha und enand ergänze schtatt konkurenziire.

Graubünde 2008[ändere | Quälltäxt bearbeite]

Lai da Mamorera

De Ernst Bromeis-Camichel het im Johr 2008 meh wi 200 See im Kanton Graubünde durchschwomme. Au de Wäg zwüsche de See het de Ernst Bromeis numme us eigener Chraft bewältiget, z Fuess oder mit em Velo. Er isch von ere Fotographin begleitet worde und s Bündner Tagblatt het vo sine Aktion immer wider aktuell brichtet. Au uf Radio e Televisiun Rumantscha isch über ihn brichtet worde.

Schwiiz 2010[ändere | Quälltäxt bearbeite]

Um s Wasser nöd numme de Bündner sondern allne Schwiizer nöcher z bringe, het s blaui Wunder im 2010 in de ganze Schwiiz schtatt gfunde. In allne 26 Kantön het de Ernst Bromeis-Camichel jewils de gröschti See durchschwomme. Am 1. Juli hät er sini Reis am Rütli aagfange und am 1. Ougschte isch er z Lozärn wider an de Viirwaldschtättersee reschpektive d Rüüs retour cho. D Gsamtschtrecki het öppe 310 km schwümme, 1500 Kilometer met em Velo und 15 km z Fuess umfasst.[1]

Rhii 2012[ändere | Quälltäxt bearbeite]

Ab Aafang Mai het de Ernst Bromeis de Rhii vo de Quelle am Oberalppass bis zu de Mündig in d Nordsee in de Nöchi vo Rotterdam innerhalb vo eme Monat welle durchschwümme. Unterstützt isch sini Aktion vo Schweiz Tourismus gsi.[2] Er het sis Vorhabe aber nach zwei Woche müesse abbreche.[3]

Expedition 2014[ändere | Quälltäxt bearbeite]

Am Mäntig, 7. Juli 2014 isch de Ernst Bromeis im Lago di Dentro bim Lukmanierpass zur «Expedition 2014» gstarted. Döt isch dä Punkt vom Rhy, wo am witischte vo sinnere Mündig z Holland awägg isch. Uf siner 1247 Kilometer lange Expedition het er öppe 200 Kilometer z Fuss müesse zruckläge, wil es ufgrund vom Hochwasser meh Schwümmverbot gäh het, wi es normalerwis der Fall isch. Er isch uf sinere «Expedition 2014» vo me Kanute, eme Logistiker, eme Rhykapitän und enere Dokumentarfilmere beglaitet worde.[4] Am 20. Augschte het de Ernst Bromeis d Nordsee erreicht und isch dodermit de zweit Mönsch gsi, wo de Rhy de Längi noch durchschwomme het.[5]

Weblink[ändere | Quälltäxt bearbeite]

Einzelnochwiis[ändere | Quälltäxt bearbeite]

  1. Etappenplan "Das blaue Wunder - Schweiz 2010". Archiviert vom Original am 14. Juli 2010; abgruefen am 13. Juli 2010.
  2. Blog zu Rhii 2012 uf de Website vo Schweiz Tourismus Archivlink (Memento vom 27. April 2012 im Internet Archive)
  3. Ernst Bromeis hat seine Stimme wieder Artikel vom Norbert Waser im Bündner Tagblatt vom 29. Mai 2012
  4. Ernst Bromeis startet zur «Expedition 2014» südostschweiz.ch Artikel vom 7. Juli 2014
  5. Ernst Bromeis erreicht nach 1247 Kilometern die Nordsee südostschweiz.ch Artikel vom 20. Augschte 2014