D Bleichemiifabrik Markelse

Die blaanti Bleichemiifabrik z Markelse isch äine vo de Aaläss für die Baadisch-elsässische Bürgeriniziative vo 1974 gsi und iire Bau isch schliesslig vo dr franzöösische Regierig verbote worde.

Dr Lauff vo dr Affääre

1973 het mä im Elsass drotz Brotest mit em Bau vom Atomchraftwärk Fassene aagfange und z Brisach het s Baadewärk (spööter EnBW) vorghaa, en anders Atomchraftwärk z baue. Und denn isch no bekannt worde, ass die Chemische Wärk Münche im elsässische Markelse e Bleichemiifabrik wäi baue, was dr Vorschau noch e bedütendi Bleibelastig uf bäide Site vom Rhii zur Folg gha hät. Am 25. August 1974 häi sich Umwältschützer us Baade und em Elsass bin ere groosse Demonstrazioon gege s badische Atomchraftwärk und d Bleifabrik zur Badisch-Elsässische Bürgeriniziative zämmegschlosse und vier Wuche druf s Bauareal z Markelse bsetzt. D Bolizei isch zwar baraat gsi, het aber nid iigriffe. Dr franzöösisch Brefekt het druf zwäi Brugge im Kräis Emmedinge für Auti lo spere, zum d Iniziative z spalte. Sübadischi Buure und Umwältschützer häi denn d Brugge bsetzt und niemer mee duuregloo. Bi de Waale zum Gmäindiroot vo Markelse häi d Gegner vom Bleiwärk gwunne. Es isch denn no bis zum 25. Februar 1975 gange, bis die französisch Regierig dr Bau vom Bleiwärk offiziell verbote het.

D Bürgeriniziative häi sich aber nid ufglööst und sich erfolgriich gegen e Bau vom e Chärnchraftwärk z Brisach und denn z Whyl gspert.

Kwelle

• Die Badisch-Elsässischen Bürgerinitiativen, abgrüeft am 12. Septämber 2015
• Der Widerstand begann vor 30 Jahren in Marckolsheim, abgrüeft am 12. Septämber 2015
• Badisch-Elsässische Bürgerinitiativen - Associations antinucléaires de Bade et d'Alsace