Antisemitismus
Dr Antisemitismus, au Judehass, isch än Art vo Rassismus. Es isch d Ablehnung vo de Jude as religiösi oder ethnischi Gruppe oder as 'Rasse' us verschiidnige Gründ.
Inhaltsverzeichnis |
Uurschbrung vom Begriff [ändere]
Dr Begriff Antisemitismus isch gege s Ändi vom 19. Johrhundert erfunde worde und wird im allgemeine nume in Bezug zu Jude bruucht, und nid gegen anderi Lüt wo ä semitische Schbrooch rede wie d Araber. 1879 het dr Wilhelm Marr s Wort Judehass in sim Buech Der Sieg des Judenthums über das Germanenthum. Vom nicht confessionellen Standpunkt aus betrachtet bruucht. S Johr druf het er s Wort Antisemitismus erfunde. Z Dütschland isch dr Begriff populär worde und d Antisemiten Liga isch gründet worde, wo zum Ziil gha het d Jude us em Land z verdriibe. Interessanterwiis isch s Wort Semitismus erscht schböter erfunde worde.
Gschicht [ändere]
Antijudaismus [ändere]
Es het kuum Ziite gä wo d Jude nid Opfer vo Antisemite worde sii. Bsundrigs schlimm isch d Diskriminierig im chrischtlige Europa gsi. Im Middelalter si d Gründ für Judehass, wo män offe agä het für zum d Jude z verfolge, im allgemeine religiös gsi: dass d Jude schuld siige am Dod vom Jesus, dass si chrischtligi Symbol nid wurde verehre, und sogar dass si Ritualmord an chrischtlige Chinder wurde bedriibe.
Antisemitismus und Rassismus [ändere]
In dr neuere Ziit si neui, nid religiösi Begründige erfunde worde: dass es ä Wältjudetum gäb, wo brobieri die ganzi Wält z beherrsche, dass d Jude religionsfindligi Kommunischte siige, und ass d Jude blutokratischi Kapitalischte siige. D Nazi, wo alle Antisemitismus überdroffe hai, wo vor ihne exischtiert het, hän d Jude as "Rasse" dargschdellt wo äso schlächt isch, as dr einzig Wäg, wie mä d Wält vo ihrer Bösheit chönnt befreie, ihri Vernichtig siig.
Antisemitismus und Antizionismus [ändere]
Wo immer mee Jude im 19. und 20. Johrhundert uf Paleschtina iigwanderet si, hai sich im Middlere Oschde bi de Nidjude die antijüdische Gfüehl verschderkt. D Araber si zum e groosse Deil noch em Erschte Wältchrieg de Ängländer, wo über Ägypte, Paleschtina und dr Irak gherrscht hai, fiindlig gegenübergschdande und hai in de dütsche Nazi natürligi Verbündeti gseh und d Jude mit de Ängländer identifiziert. Antisemitischi und antizionistischi Motiv wärde in dr arabische Brobaganda gege d Jude, und siit 1948 gegen ä Schdaat Israel bruucht. Antisemitischi Machwärk wie „D Protokol vo de Wiise vo Zion“ wärde frei in arabische Länder verchauft, antisemitischi Karikature in Ziitige veröffentligt und au in Schuelbüecher het s antisemitischs Material. Siit öbbe 2000 hai die paleschtinensische Behörde afo neui Büecher iifüehre, wo in dr Meinig vom Nathan Brown vo dr George Washington University wenig aaschdöösigs Material enthalte.[1] Aber dr arabisch Antisemitismus bliibt wiitverbreitet und isch jetzt hüfig e Beschdandeil vom Antiamerikanismus, wo vor allem in de islamische Länder sehr schdark verbreitet isch.[2]
