Alti Landschaft

Di Alti Landschaft vo de Schtadt Fryburg (mit de Verwaltigsgränze vo 1999 zur bessere Orientiirig)

Di Alti Landschaft (frz.: Anciennes Terres) isch de Näme vom früheschte Untertanegebiet vo de Schtadt Fryburg rund um d Schtadt umme. Es isch uf beidne Site vo de Saane gläge u ligt genau uf de romanisch-germanische Sproochgränze.

Entstehig

D Schtadt Fryburg het zwüschem 13. un em 15. Johrhundert d Herrschaft über di Alti Landschaft übercho. En Teil isch zerscht im Bsitz vo de Grafe vo Thierstei gsi, als Lehe a Schtadtbürger cho un im 1442 vo Fryburg kauft worde. Im 1452i isch d Vogtei Alteryf dezu cho un im 1467 het me sich mit Bärn geiniget, wo d Gränze zwüsche de Herrschafte soll si. Dodermit isch d Bildig vo de Alte Landschaft abgschlosse gsi.
De Näme findt me zum erschte Mol im 1549, wo me s bisherige Gebiet vo de Schtadt vo de Vogteie unterschide het, wo d Schtadt Fryburg nach em 1467i noi erworbe het.
D Verbindige vo de Schtadt zu de Landschaft îsch eng gsi. De Märit isch z Fryburg gsi, was engi wirtschaftlichi Beziihige bedütet het un uf de Ebeni vo de Chile hei di Pfarreie vo de Alte Landschaft s Dekanat Fryburg bildet.

Panner

D 26 Pfarreie, wo im 1648 zu de Alte Landschaft ghört hei, sin in vier Panner iiteilt gsi:

• Burgpanner
• Aupanner
• Spitalpanner
• Neustadtpanner

Weblink

• Ernst Tremp: Alti Landschaft. In: Historisches Lexikon vo dr Schwiiz.