Achilles Leissler

Us der alemannische Wikipedia, der freie Dialäkt-Enzyklopedy
Dialäkt: Baseldütsch

Dr Achilles Leissler (* 13. August 1723 z Baasel, 14. April 1784 z Baasel) isch e Baasler Rootsherr und Siidebandfabrikant gsi.

Lääbe[ändere | Quälltäxt bearbeite]

Dr Achilles Leissler isch as Soon vom Handelsmaa und Baasler Groossroot Achilles Leissler und dr Gertrud Ortmann z Baasel uf d Wält khoo. Vo sine Gschwüsterte häi nume d Schwöstere überläbt, sini bäide Brüeder si jung gstorbe. Wo dr Achilles vierzääni gsi isch, isch si Vater gstorbe. Er het en Usbildig zum Kaufmaa gmacht und isch in d Firma vom Vater iidräte, won er erwaggse worde isch. 1743 het er d Dochder vom Kaufmaa Onophrion Hoffmann, d Maria, ghürootet.

Vo 1745 bis 1751 häi dr Baasler Archidekt Johann Jacob Fechter und dr Stäimetz Daniel Büchel für iin s Landguet «Sandgruebe» vor de Door vom Chläibaasel baut, wo 1795 noch em Dood vo sinere Frau in Bsitz vom Johann Jakob Burckhardt-Keller khoo isch, und dä het s 1804 im Kaufmaa Johann Jakob Meriaa verkauft.[1] Dr Fechter het au dr Andlauerhoof am Münsterblatz modärnisiert, wo s Leisslers denn gwoont häi.

Si Baudäätikäit het au sini Schwöstere inspiriert. Die eltisti, d Magaretha Weiss-Leissler, häig iire Maa drzueaadriibe, dr Württebärgerhoof abzrisse und en no schööner wider ufzbaue. Si het au iire Landsitz, s Bruggguet Münchestäi, renowiert. Au d Valeria, wo dr Oberstzumftmäister Johannes Faesch ghürootet het, het sich in dr Nööchi vo dr Sandgruebe e chliises Landguet baut. Aber schon e baar Joor, bevor dr Achilles d Sandgruebe baut het, het dr Maa vo sinere Schwöster Elisabeth, dr Teggstiilfabrikant Emanuel Rhyner, näbe sinere Indienne-Fabrigg sich e Landsitz iigrichdet. Wo dr Achilles denn si Landsitz nid wit äwägg drvo baut het, het en dr Gstank us dr Fabrigg gstöört, und er isch wääge däm vor Gricht gange.[1]

S Leisslers häi käini Söön ghaa und dorum het dr Achilles 1777 si Firma ufglööst. Er het Däil vo sim Bsitz verkauft wie 1781 dr Ernauerhoof, und het sich ganz uf si Landsitz, d Sandgruebe, zruggzooge. Won er 1784 gstorbe isch, isch si Witwe die äinzigi Erbin gsi. Dr Achilles Leissler isch im Chrüzgang vom Münster begraabe.[1]

Politik[ändere | Quälltäxt bearbeite]

1757 isch dr Leissler Baasler Rootsherr worde und vo 1768 bis 1783 isch er Ooberstzumftmäister gsi. Usserdäm isch er au Bresidänt vom Bau- und Stallamt worde.

Dr Leissler het zur iiflussriiche Grubbe vo de Siidebandfabrikante ghöört, wo im Root sich drfür iigsetzt het, ass die staatlige Reglementierige vom Handel abgschafft wurde.

Kwelle[ändere | Quälltäxt bearbeite]

Fuessnoote[ändere | Quälltäxt bearbeite]

  1. 1,0 1,1 1,2 Die Sandgrube uf altbasel.ch, abgrüeft am 27. Novämber 2014