S Zungebei bi de Wirbeldier

Us der alemannische Wikipedia, der freie Dialäkt-Enzyklopedy
Os hyoideum – vo oben us gseh
D Lage im Körper

S Zungebei (Os hyoideum) isch e chliine bogene Chnoche am Muulbode under dr Zunge. Es isch nit mit em rästlige Skelett verbunde, sondern nume an Muskle und Bänder ufghängt und mä cha s dur d Huut gspüre. S Zungebei het d Form vom ene U und isch bim Mensch öbbe 2 bis 3 cm gross. Embryonal entstoht s Zungebei us de Chnorpel vom 2. und 3. Kiemeboge.

Bi de Süüger bestoht s us eme Mittelstück (Körper) und zwei Baar siitlige Fortsetz (Hörner). S hindere Baar vo dene Fortsetz isch chlii und mit em Chehlchopf verbunde, s vordere isch grösser und am Schlööfebei agmacht. Bi Affe und Mensche verschmilzt sogar s obere Drittel vom vordere Horn mit em Schlööfebei und bildet däm si so genannte Griffelfortsatz, währed dr Räst oder wenigstens s zweite Drittel unverchnöcheret bliibt und as Ligamentum stylohyoideum s Zungebei und dr Griffelfortsatz verbindet. Beidi Bäärli vo Hörner si bi de niidere Wirbeldier grösser und si mögligerwiis d Räst vom erste Kiemeboge und em Zungebei, wo bi de Fisch no voll entwicklet gsi isch, währed dr so genannti Körper, wo mänggisch us meh as eim Deil bestoht, wo hinderenander lige, s Mittelstück vom Zungebeiboge repräsentiert.

Funktion[ändere | Quälltäxt bearbeite]

S Zungebei isch mit Bänder und Muskle im Beriich vo dr Schädelbasis festgmacht. Wäge däm het s en Art Schaukelfunktion. An dr Undersiite vo dr Schaukle si mit Bewegigsoptimierig dr Chehlchopf und d Luftröhre ufghängt. Das wirkt sich günstig ufs Schwätze, Schlucke, Schnuufe und Hueste us.

Muskle[ändere | Quälltäxt bearbeite]

Am Zungebei setze vili Muskle aa, wo je noch dr Lag vo ihrem Ursprung zum Chnoche in zwei Gruppe chönne iideilt wärde:

Suprahyali Muskulatur: Si zieht s Zungebei ufwärts und hilft bim Schlucke.

  • Musculus geniohyoideus, Ursprung: Chiini (Underchiifer), Innervation: Ansa cervicalis und Nervus hypoglossus (XII)
  • Musculus digastricus mit Venter anterior, Ursprung: Underchiifer, Innervation: Nervus mylohyoideus (V3) und Venter posterior, Ursprung: Processus mastoideus, Innervation: Ramus digastricus (Nervus facialis)
  • Musculus mylohyoideus, Ursprung: Underchiifer, Innervation: Nervus mylohyoideus
  • Musculus stylohyoideus, Ursprung: Processus styloideus vom Schlööfebei, Innervation: Ramus stylohyoideus (VII)

Infrahyali Muskulatur: Si zieht s Zungebei abwärts. Alli Muskle vo dr Gruppe wärde vo dr Ansa cervicalis innerviert.

  • Musculus omohyoideus, Ursprung: Schulterblatt
  • Musculus sternohyoideus, Ursprung: d Hindersiite vom Manubrium sterni am Brustbei
  • Musculus sternothyroideus, Ursprung: wie dr Musculus sternohyoideus. Er setzt as dr einzig Muskel vo dr Gruppe nit am Zungebei, sondern am Schildchnorpel aa.
  • Musculus thyrohyoideus, Ursprung: Schildchnorpel. Er dient as Fortsetzig vom M. sternothyroideus.

Weblingg[ändere | Quälltäxt bearbeite]


Dä Artikel basiert uff ere fräie Übersetzig vu dere Version vum Artikel „Zungenbein“ vu de dütsche Wikipedia. E Liste vu de Autore un Versione isch do z finde.