Ylfete Fanaj

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

D Ylfete Fanaj (* 11. Juli 1982 z Prizren, dertemool Jugoslawie, hüt Kosovo) isch e Schwyzer Politikeri vo de SP mit kosovo-albanische Wùrzle. Syt April 2011 isch si Kantonsröötin im Kantonsroot Luzärn. Syt em März 2011 isch si usserdäm Mitgliid vo de Gschäftsleitig vo de SP Kanton Luzärn. Si isch di erschti Schwyzeri mit albanischer Herkùmft, wo in es Legislativ-Organ gwäält worde isch. Vo 2009 bis 2012 isch d Ylfete Fanaj Präsidenti vo Second@s Plus Schweiz gsi.

Biografi[ändere | Quälltäxt bearbeite]

D Ylfete Fanaj isch am 11. Juli 1982 in de südkosovarische Stadt Prizren ùff d Wält cho, wo zue derre Zyt zur Autonome Provinz Kosovo innerhalb vo de Sozialistische Föderative Republik Jugoslawie ghört het. Ùffgwaggse isch si imene Dorf in de Nööchi vo Prizren. Ihr Vater isch in de 1980er Joor als Saisonnier in d Schwyz cho ùn 1990 sin syni Frau ùn di beide jüngre Gschwüster vo de Ylfete noochzooge, derwyylscht d Ylfete mit de ältre Schwöschter bi de Groossmueter blybe isch. Wo sich 1991 di politischi Situation im Kosovo all mee verschlechteret het ùn di albanischsproochige Schuele gschlosse worde sin, sin d Ylfete ùn ihri ältri Schwöschter in d Schwyz gfolgt. Si hen debi ghofft, bal wiider in d Heimet zrùggzgoo. D Situation dörte het sich aber chuum verbesseret. D Ylfete isch drùff z Sursee im Kanton Luzärn in di 2. Klass yygschuelt worde.

Si isch dörte trotz guete Note nùmme ùff d Sekundarstufe I yygstuft worde, wo si au mit guete Note absolviert het. Einewäg het si trotz lenger Suech kei Lehrstell gfùnde, wo nooch eigne Aagabe wohl ihr Name ùn Nationalität e Roll gspiilt het. Als Zwüschelöösig het si deno di 4. Klass vo de Sekundarstuf zuesätzlig gmacht. Schliessli het si doch no en Ussbildigsblatz bi de ECAP Zentralschweiz z Luzärn als Kauffrau gfùnde. Nooch ihrem KV-Abschlùss het si 2003 e Stell im Sekretariat bi de Fachstell Integration vùm Kanton Luzärn gfùnde ùn het beruefsbegleitend d Beruefsmatura gmacht, wo si 2005 erfolgryych abgschlosse het. Drùff het si e Studium zu Sozialer Arbet aa de Hochschuel Luzärn aagfange, wo si im Spootjoor 2009 mit em Bachelor abgschlosse het. Dernäbe het si bis 2016 Deilzyt als Sozialarbeiteri aa de Fachstell Gsùndheitsförderig ùn Integration bim Kanton Nidwalde als Integrationsbeùfftraiti gschafft. Vo 2011 bis 2013 het si usserdäm Rächtswüsseschaft aa de Universität Luzern studiert, ùn im Septämber 2016 e Masterstudium für Soziali Arbet aa de Hochschuel Luzärn aagfange.[1]

D Ylfete Fanaj gseet si als gläubigi aber nit religiösi Muslima, wyl de Islam de Religion vo ihrer Familie isch. Si isch aber nooch eigne Aagabe zum erschte Mool mit 24 Joor inere Moschee gsi, ùn zwar bimene Sproochùffenthalt z Irland.[2]

Politischi Laufbahn[ändere | Quälltäxt bearbeite]

Aagfange het d Ylfete Fanaj ihri politischi Karriere bi de Organisation vo ùn für Secondos, de Zwyygstell Luzärn vo de Second@s Plus Schweiz. Im Joor 2007 isch si in de Vorstand vo däm Verein cho ùn 2008 in de Vorstand vùm gsamtschwyzerische Verein, wo si im Joor 2009 Präsidenti worde isch.

Scho syt 2006 isch si Mitgliid vo de Gschäftsleitig vo de SP Stadt Luzärn im Ressort Kommunikation gsi. Im Joor 2007 isch si usserdäm als SP-Kandidatin in de Groossstadtroot vo Luzärn gwäält worde. Im März 2011 het si in di kantonali Sektion vo de Partei gweggslet. Im April 2011 isch si in de Kantonsroot vo Luzärn gwäält worde. Dörte isch si Mitgliid in de Staatspolitische Kommission vùm Kantonsroot. Si isch di erschti Politikeri in eme Legislativ-Organ in de Schwyz mit albanische Wùrzle.

Bi de Schwyzer Nationalrootswaale vùm 23. Oktober 2011 het d Ylfete Fanaj 9.806 Stimme übecho, het es aber nit in de Nationalroot gschafft.

Im März 2015 isch si für e zweiti Amtszyt ins Luzärner Kantonalparlament gwäält worde.[3]

Vereinsaktivitäte[ändere | Quälltäxt bearbeite]

D Ylfete Fanaj isch in verschiidne Verein, wie zum Byspil im Verein Asylbrücke z Zug, im Programm zwangsheirat.ch, im Verein ZiB Zentrum für interkulturelle Bildung z Luzärn ùn im Verein Politforum Zentralschweiz. Dernäbe isch si no im Vorstand vùm ZiB Zentrum für interkulturelle Bildung ùn vùm Verein LISA – Luzerner Verein für die Interessen der Sexarbeitenden. Syt 2005 ùnterrichtet si usserdäm Dütsch für främdsproochigi Chinder.

Weblink[ändere | Quälltäxt bearbeite]

Fuessnote[ändere | Quälltäxt bearbeite]

  1. http://www.ylfetefanaj.ch/#persoenlich
  2. http://www.ylfetefanaj.ch/uploads/dokumente/MM_Cover.pdf
  3. Albanische Namen in der Schweizerischen Politik – Ylefete Fanaj gewinnt ihr zweites Mandat im Luzerner Kantonsparlamant. In: Albinfo.ch. 2015-03-30. Abgrüeft am 2015-05-04.
Information icon.svg Dä Artikel basiert uff ere fräie Übersetzig vum Artikel „Ylfete_Fanaj“ vu de dütsche Wikipedia.

E Liste vu de Autore un Versione isch do z finde.