Wilhelm Bernhard vo Muralt

Dr Wilhelm Bernhard vo Muralt (* 19. April 1737 z Bärn; † 18. Dezämber 1796 z Bärn) isch e Schwiizer Milidär und Politiker gsi.

Läbenslauf

Dr Wilhelm Bernhard vo Muralt isch am 19. April 1737 z Bärn uf d Wält cho. Er isch dr Sohn gsi vom Bernhard vo Muralt, eme Bärner Grossroot und Vogt und vo dr Ursula Maria Manuel.

In französische Dienst

Vo 1759 bis 1772 isch er z Frankreich Offizier gsi. Er isch mit em Verdienstchrüz uszeichnet worde und het 1772 im Rang vo Major si Abschiid gnoh.

Dr Bärner Politiker

1775 het er sich mit dr Emilie Elisabeth Sinner vo Ballaigues, ere Dochder vom Johann Rudolf Sinner, verhürotet. im gliiche Johr isch er Bärner Grossroot worde, und vo 1776 bis 1782 isch er Landvogt vo Gottstatt gsi. 1782 isch er Oberstlütnant vo dr Bärner Miliz worde. 1786 isch er in Chleiroot gwehlt worde und 1789 het er as Welschsäckelmeister dient.

Dr eidgenössisch General

Vo 1790 bis 1792 isch dr Muralt Oberst vo dr Bärner Miliz im Waadtland gsi. Zu dere Ziit het sich vil veränderet z Frankriich, aber au in dr Schwiiz isch agitiert worde, und die konservative Regierige si verunsicheret gsi. Z Basel het sich mit dr Abschaffig vo dr Liibäigeschaft 1791 öbbis politisch afo beweege, und noch em Stum uf d Tuilerie am 10. August 1792 si die überläbende Schwizer Söldner in ihri Heimet zruggcho und vili von ene hai mit dr Revolution sympatisiert. D Bärner Patrizier hai sich au bedroht gfüehlt vo Frankriich, au wenn die revolutionäri Regierig brobiert het d Schwizer z beruehige. Bärn het dr Muralt z Nyon stationiert mit ere Armee vo 12000 bis 14000 Maa. Vom Septämber bis zum Dezämber 1792 isch er Oberbefählshaber vom eidgenössische Druppenufgebot in der Waadt gsi, wo d Gämfer Regierig Züri und Bärn um e 1600 Maa starki Hilfsdruppe bittet het. D Bärner hai 1500 Maa vo ihre Druppe in dr Waadt gschiggt und d Zürcher e Kondingänt vo 640 Maa. Me het aber brobiert en Eskalation z vermiide. Dr Muralt het vom Bärner Chriegsroot dr Befähl übercho, sich defensiv z verhalte, aber wenn d Gämfer s wurde verlange die eidgenössische Druppe dört z versterke. Am 22.Oktober hai d Gämfer mit em französische General Montesquiou uusghandlet, ass d Zürcher und d Bärner wurde us dr Stadt abzieh.

1796 het dr Muralt s Presidium vo dr Friidenskommission gha, wo vo dr eidgenössiche Dagsatzig iigsetzt worden isch für zum mit de Franzose z verhandle.

Dr Muralt isch am 18. Dezämber 1796 z Bärn gstorbe.

Quelle

• Christian Müller: Muralt, Wilhelm Bernhard von. In: Historisches Lexikon vo dr Schwiiz.
• Europäische Annalen, Dritter Band, Jahrgang 1805, I. S. Cotta, Tübingen 1805