Tuileriesturm

Us der alemannische Wikipedia, der freie Dialäkt-Enzyklopedy
«La prise des Tuileries», Gmäld vom Jean Duplessi-Bertaux, 1793

Dr Tuileriesturm am 10. August 1792 isch en Ereignis währed em Ufstand vom 10. August 1792 z Paris gsi, e Deil vo dr Französische Revolution. In dr französische Gschichtsschriibig si die Ereigniss au under dr Bezeichnig «le 10 août», «journée du 10 août» oder as «insurrection du 10 août» bzw. «massacre du 10 août» bekannt. Die königlichi Residänz, wo vo dr Schwizergarde verteidigt worden isch, dr Tuileriepalast, isch an däm Dag vo ufständische Bevölkerigsdeil mit dr Understützig vo dr revolutionäre Stadtregierig vo Paris gstürmt worde. Dr König Louis XVI. isch zur Flucht in d Nationalversammlig zwunge und die französischi Aristokratii vorläufig gstürzt worde. D Schwizergarde het hochi Verlust erlitte. Mit dere «zweite Revolution» isch die gmässigti ersti Phase vo dr französische Revolution in die radikali zweiti Phase übergange. Bi de Neuwahle zum Nationalkonvent, wo denn abghalte worde si, isch s zum ene politische Linggsruck cho, wil d Feulliants us em Parlamänt usgschlosse worde si. Jezt hai die rächts positionierte Girondiste die gmässigteri Position verdräte, währed uf dr lingge Siite d Montagnards (Bärgpartei) dr radikal Flügel under em Robespierre bildet hai. Mit dr Entlassig vo alle schwizerische Druppe us französische Dienst isch die militärischi Zsämmenarbet zwüsche Frankriich und dr Eidgenosseschaft noch fast 300 Johr abrupt beändet worde.