Wikipedia:Treffen der Wikipedianer/Novämberdräffe 2024
Di voranig Diskussioon findsch uf em Stammtisch.
Termyn: Samschtig, 23. Novämber 2024
Ort: Fryybeg.
Churzbricht
[Quälltäxt bearbeite]
Am e ais zmittag hän si dr Terfili, d Mireille un dr Holder im Hauptbahnhof z Fryburg am Café Coucou droffe. Mer hän zerscht e Kaffee drunke un druf gwartet, eb no ander Lyt chemme. Schließli simer mit albanischem Bärgtee (Sideritis syriaca) im Rucksack zum Colombischlessli gloffe un hän is dert d Uusstellige mit Fund us dr Region im Archäologische Museum aagluegt. Unter anderem hämer Chlinge us Fyyrstai un Wärchzyg us Chnoche us dr Altstaizyt, Tongfäß us dr Jungstaizyt, Waffe us dr Bronzezyt, Gschiir us dr Yysezyt, Alldaagsgeegeständ us dr Remerzyt un Schmuck us em Friemittelalter chenne bewundere. Derzue simer dur d Sunderuustellig KeltenKids zoge un hän im Chäller in dr alamannische Schatzchammere versucht, verschideni Runeinschrifte z entziffere. Unter andrem hemmer de Runestab von Niidinge chönne bewundre un hen schliessli au d Rune druff entdeggt. Eso wisse mer jetz, dass öbe im 6. Joorhundert d Imuba em Hamal viil Liebi gwünscht het ùn sich drum vo de Bliþguþ (eini vo de sältene bekannte Runeritzerinne) de Wunsch in en Holz het lo ritze. Bi de Froog, uff wellere Entwiggligstapfel d Luutig vum Diphthong Liubi stoot, hemmer leider üsri Fachlüt bi somene Thema schmärzhaft miesse vermisse.
Derno simer no iber dr Wynächtsmärt flaniert, wu mer e Hufe Lyt hän here Alemannisch schwätze – dr ganz Wynächtsmärt isch voll mit Schwyzer gsii! D Mireille isch derno mit em Zug wider Richtig Elsass gfahre un dr Terfili un dr Holder sin no in e Wirtschaft gange go ebis drinke. Mer hän driber sinniert, eb dr Rhyfäldemer Dialäkt villicht irgendwänn nume no in ere Sprochinsle im sidlige Albanie iberläbt un wie groß Läbchueche sotte syy. Am Änd simer ussenander gange mit em Bschluss, ass mer s negscht Mol Termin un Ort vun eme Dräffe friejer sotte feschtlege un nit erscht ai Dag vorhär … --Holder (Diskussion) 22:23, 24. Nov. 2024 (MEZ) mit Ergänzige vum --Terfili (Diskussion) 23:00, 24. Nov. 2024 (MEZ)