Wikipedia:Eigetum an Artikel
Vili Mänsche wo bi dr Wikipedia mitarbeite, entwiggle Bsitzaasprüch aa denne Artikel, wo si dra gschafft hen oder nöi gschriibe hen. Des isch verständlich, allerdings stoot bi jedere Bearbeitig ganz unte: “Alli Byträg für d’Wikipedia falled under di GNU Freji Dokumentations-Lizenz. Wenn'er nid wänd, dass öie Tekscht cha veränderet und verbreitet werde, de dörffet'er das Formular nid abschicke.”. Des heisst jeder Autor, wo des gläse het, weiss, dass er erwarte mues, dass andri de Artikel, wonner gschriibe het, chönne gnadelos kritisiere un bearbeite. Un dass nüt alli d glychi Meinig zumene Thema hen, isch sälbschtverständlich.
E Autor derf natürli verlange, dass e Bearbeitig wider ruggängig gmacht wird, wenn er oder si meint, dass d alti Version besser gsi isch. Aber er mues wie alli andri begründe, wiiso dass syni Version sachlich, stilistisch, sproochlich oder inhaltlich besser gsi isch.
Umgekehrt scheue sich mangmool Autore en andre Artikel z bearbeite, au wenn si mitem Inhalt nüt yverstande sin. Des Problem stellt sich bsunders uf dr alemannische Wikipedia, wo es e Viilzaal vo Dialäktspiilarte un Schrybige git.
E fiktivs Byspil wär: En Grossbasler schrybt en Artikel über syn Stadtdeil un meint doo, dass Grossbasel dr schönri Deil vo dr Stadt Basel isch un dass allene Glaibasler Hörner ufem Chopf waggse. Denoo entfernt en Glaibasler de Abschnitt un verwiist uf d Richtlinie, dass Beleidige un sachlich falschi Sache nüt erwünscht sin. Jetz setzt de Grossbasler Hauptautor de Artikel uf syni Version zrugg un meint “ich bi vo Grossbasel un derf entscheide was doo im Artikel stoot, du als Glaibasler derfsch doo nit schriibe”. Noochem Wikipediaprinzip het de Grossbasler Autor allerdings kei Rächt z bestimme, was im Artikel, wonner gschriibe het, verändret wird.
Artikel unterschrybe
[Quälltäxt bearbeite]Mangi Autore wenn de Artikel, wo si gschriibe hen, als ihre markiere un unterschrybe ihn mit viir Tilde (--~~~~) wie en Diskussionbytrag. Des isch nüt erlaubt. De Autor vunere bstimmte Version wird scho i dr Versionsgschicht (rächts näbe “Bearbeite”) feschtghalte.
Usnaame in dr alemannische Wikipedia
[Quälltäxt bearbeite]In dr alemannische Wikipedia wird dr Wille vum Hauptautor durch Konvention e chly bitz mee respektiert wie z.B uf dr änglische Wikipedia. Des sött sich aber uf Usnaamefäll beschränke un au en Hauptautor vumene Artikel muess Ändrige akzeptiere, wenn syn Artikel gäge e Richtlinie oder Konventione verstosst.
Ei wichtigi Ussnaam zue dere Regel betrifft de Dialäkt. Dr Dialäkt vum Hauptautor derf nüt eifach verändret werre. Lueg dezue uf Frooge un Antworte zum Dialäkt.