Wasserflue

dr Felschopf vo dr Wasserflue, vo Noorde häär gsee

D Wasserflue isch e Hööchi vom Jura im Kanton Aargau.

Es isch s öschtlichen Ändi vom Bärgzuug, wo sich über drüü Kilometer vo dr Salhööchi über d Egg hiiziet und wo d Wasserflue mit ere hööche Flue abschliesst. Dr Felschopf, wo s uf drüü Syte stotzig abegoot, stoot über der Heerematt und isch im Gmeindbann vo Chüddige.

Drufoben isch es Chänzeli, wo men e gueti Uussicht uf s Aaretal aben und über s Mittelland bis zu den Alpe het. Es hett druff es Signal, wo me für d Landesvermässig bruucht.

Uf em Bärgrugge isch drüühundert Meter weschtlich vom Felschopf dr Sändeturm Wasserflue, wo drüber s Färnsee, s Radio und d Verbindige für d Händy lauffe.

S Mundartwort «Flue» isch i dr Schwiiz wyt vrbreitet für markanti Felse. S chunt vom althochdütsche fluoh, wie men uf dr Websyte ortsnamen.ch cha go lääse. Bi dr Syte zu dr Wasserfluh i dr Oschtschwiiz vrnimt men au, dä Bärgname sig d Vrchürzig vo «Wasserscheidefluh». Er bedüütet also: dr Felse bi dr Wasserscheidi. Gmeint isch im Fall doo d Bärglinie, wo s Wasser im Süde gäg dr Aaren und im Norde uf Oberhof im Fricktal abe laufft.

Weblink

 Commons: Wasserflue – Sammlig vo Multimediadateie

• Wasserflue-Webcam uf em Sändeturm
• Wasserfluh (Toggeburg), uf ortsnamen.ch