Dierchreiszeiche

Us der alemannische Wikipedia, der freie Dialäkt-Enzyklopedy
Dialäkt: Markgräflerisch (Ebringe)

Als Dierchreiszeiche (au Sternzeiche gnennt) bezeichnet mer 12 Abschnitt vu je 30 Grad uf dr Erdbahn um d'Sunne. Si sin dorum im Grund nit anders wie e antiquierti Bezeichnig fer die ekliptikal Längi vume Gstirn.

Sachverhalt[ändere | Quälltäxt bearbeite]

D'Zellig vu dr Abschnitte fangt bi dem Punkt vu dr Erdbahn a, bi dem d'Erdax tangential zue dr Erdbahn stot un dr subsolar Punkt uf dr Erdchugle dr Erdäquator vu Süde nooch Norde yberschrittet (also dr Früehligsafang uf dr Nordhalbchugle), und folgt no dr Bewegigsrichtig vu dr Erde um d'Sunne.

Ufgrund vu dr Ellipsebahn vu dr Erde um d'Sunne durwanderet d'Erde die einzelne Abschnitte underschidlich schnell. In Sunneferni (derzitt im Nordsummer und im Südwinter) langsamer wie in Sunnenächi (derzitt im Nordwinter und im Südsummer). Dorum sin die Abschnitt au underschidlich (zwische 29 un 32 Däg) lang.

Die in dr Nächi vu dr Erdbahnebeni (Ekliptik) im Sternehimmel glägene Regione nennt mer «Dierchreis» (im grichische Fachwort "Zodiak") un die 12 Abschnitte vu dr Erdbahn um d'Sunne nennt mer au Dierchreiszeiche. Dr Abschnitt mit dr ekliptikale Längi vu 0 bis 30° heisst bispilswiis Widder.

D'Dierkreiszeiche sin nooch 12 vu dr 14 Dierchreisternbilder benennt – also sälle Sternbilder, wo d'Ekliptik dedur verlauft. D'Sternbilder "Schlangeträger" (Ophiuchus) un "Wal" (Cetus) hän keini Pendants as Dierchreiszeiche. Während d'Sunne mehreri Wuche im Sternbild Schlangeträger z'sähe isch, isch si im Wal numme e baar Stund.

Vor guet 2000 Johre isch d'Sunne, wenn d'Erde bispilswiis dur dr Bahnabschnitt mit em poetische Namme Widder gwanderet isch, im Sternbild Widder gstande, Säll isch hüt nümmi dr Fall, wil in Folg vu dr Präzession vu dr Erdax dr Früehligspunkt uf dr Erdbahn wanderet. Sit dr Festlegig vu dr Sternbildgrenze dur die International Astronomisch Union hän d'Sternbilder un Sternzeiche sowiso numme no dr Namme gmeinsam.

D'Erdbahnabschnitte als Dierchreis[ändere | Quälltäxt bearbeite]

Dr Durlauf durs jewilig Bahnsegment isch wäge dr Schaltjohre un sustige chleinere Effekte jedes Johr e chlei Wengili anderst. Massehoroskope dien säll in dr Regel nit berucksichtige.

In dr folgende Tabelle sin d'Itrittswerte fers Johr 2006 agä, wobi uffgrund vu dr Zellig vum Früehligspunkt a dr Jänner un dr Februar erst am Schluss chumme.

Wichtig sin d'Itrittpunkte bi 0°, 90°, 180° un 270° als astronomischer Afang vu dr Johreszitte.

Ekliptiklängi Itritt anno 2006 Symbol alemannischer Namme latinischer Namme
0° - 30° 20.03.2006, 18:26 h UTC
(Nordfrüehlig)
Widder Aries
30° - 60° 20.04.2006, 06 h UTC Stier/Muni Taurus
60°- 90° 21.05.2006, 04 h UTC Zwilling Gemini
90° - 120° 21.06.2006, 12:26 h UTC
(Nordsummer)
Chräbbs Cancer
120° - 150° 23.07.2006, 00 h UTC Laie Leo
150° - 180° 23.08.2006, 08 h UTC Jungfrau Virgo
180° - 210° 23.09.2006, 04:03 h UTC
(Nordherbst)
Woog Libra
210° - 240° 23.10.2006, 14 h UTC Skorpion Scorpio
240° - 270° 22.11.2006, 12 h UTC Schütze Sagittarius
270° - 300° 22.12.2006, 00:22 h UTC
(Nordwinter)
Steibock Capricornus
300° - 330° 20.01.2006, 06 h UTC Wasserma Aquarius
330° - 360/0° 18.02.2006, 20 h UTC Fische Pisces

witteri Informatione[ändere | Quälltäxt bearbeite]

D'Dierchreiszeiche spile e zentrali Rolle in dr Astrologi, wo – je nooch Standpunkt – als Para- oder Pseudowisseschaft bezeichnet wird. Die behauptet, es gäb e statistisch signifikante Zämmehang zwische vum vu dr Erde durloffene Erdbahnabschnitt und dr Geburt vu eme Mensch, un macht uf dere Grundlag Analyse – sognennti Horoskope. Die bluemig daifte Segmente vu dr Erdbahn bilde als schinbari Sunnebahn d'Grundlag fer s'obendländisch Horoskop. Es isch e umsatzstarchi Branche wo devu läbt, allerdings isch e signifikante statistische Zämmehang zwische Läbenslauf un Erdbahnabschnitt bi dr Geburt vume Mensch nit noochgwiise.

D'Erchlärig vu dr Dierchreiszeiche erfolgt do im e heliozentrische Bezugssystem.