Taminabrugg

Us der alemannische Wikipedia, der freie Dialäkt-Enzyklopedy

Koordinate: 46° 59′ 24″ N, 9° 29′ 24″ O; CH1903: 756031 / 206366

Taminabrugg
Taminabrugg
Taminabrugg
d Taminabrugg Endi Oktober 2016
Brucht as Stroossebrugg
Goot über Tamina
Ort Pfäfers, Valens
Konstrukzioon Bogebrugg us Beton
Gsamtlengi 475 m[1]
Bräiti 9,5 m
Witi 260 m
Pfiilhööchi 35 m
Hööchi 200 m
Bauchöste 56 Mio. SFr.
Aafang vom Baue 2013
Fertig worde planet för 2016
Eröffnig 22. Juni 2017
Blaaner Leonhardt, Andrä & Partner
Lage
Taminabrücke (Schweiz)
Taminabrücke (Schweiz)
Taminabrücke
Taminabrücke

D Taminabrugg isch e Stroossebrugg im Taminatal im Kanton Sanggale. D Brugg, wo im Juni 2017 eröffned woren isch, gilt as eini vo de gröschte Bogebrugge und mit ere Längi vo 475 Meter as di Längschti i de Schwiz.

Projekt[ändere | Quälltäxt bearbeite]

Di diräkti Stroosseverbindig vo Bad Ragaz uf Valens, wo hüt nüme befahre wäre dörf, verlauft i me gwüsse Abschnitt öber rutschigs Gländ. Si isch zuedäm rächt stail, hät schmaali Stelle und engi Kurve. Drumm isch d Idee för e Brugg öber s Tobel vo de Tamina ufchoo und e öber 400 Meter langi Bogebrugg, mit ere Spannwitti vo 260 und ere Höchi vo 35 Meter, uugfär 200 Meter öber em Fluss, wo die beede Ortschafte Pfääfers und Valens verbende söll isch planed wore. Esoo cha e sicheri Zuefahrt vo Ragaz via Pfääfers ermöglicht wäre, ohni as mer en Umwäg öber Vasön, Mapragg und Vadura mache mues. S ganz Projekt, d Brugg und Zuefahrtsstroosse, isch mit rund 56 Millione Franke Choschte budgetiert wore – däför chöni me s Gäld för d Sanierig vo de bishärige Zuefahrt vo Ragaz ufe uf Valens spare.

Gege s Projekt vo däm Bruggebau öber s Taminatobel isch im Herbst 2010 Widerstand us de Bevölkerig gwachse.[2]

Am 1. Dezember 2010 hät de Kantonsrot vo Sanggale s Projekt bewilliget[3] und am 22. Mai 2012 hät de Regierigsrot vom Kanton Sanggale grües Liecht för de Bau gee.[4]

6. März 2015, e paar Wuche vor em Bogeschluss. Blick vo Suldis noch Bofel us nordwestliche Richtig.

Bau[ändere | Quälltäxt bearbeite]

Aafangs Oktober 2012 isch mit de Vorarbeite för de Bau vo de Zuefahrtsstroossene aagfange wore.[5] De offizielli Spatestich isch am 28. März 2013 gsi. De Hochsailartischt Freddy Nock hät a däm Aalass d Schlucht uf eme 417 m lange Sail öberquärt.[6]

Im Früelig 2013 sind zerscht d Fundamänt för di beede Ändi vom Boge baut wore. Dänn händs a däne Stelle je en höche Torm (Hilfspülon) uufgschtellt. Die hät me nu för d Drootsaili bruucht, wo bim Bau vom Boge als «Stützi» diened händ. So hät de Boge im Freivorbau, i jewils föf Meter lange Abschnitt, vo beedne Syte här erstellt wäre chöne. Am 28. März 2015, gnau zwo Johr noch Baubeginn, isch de Bogeschluss gmacht wore.[7] Wo de Boge fertig betoniert gsii isch, hät me d Hilfspülon wider abbaue und aagfange, uf em Boge obe, vo de Bogemitti uus uf beed Site, d Fahrbahn zbaue.

Zerscht isch planet gsii, as d Taminabrugg ab em Sommer 2016 em Vercheer öbergee wäre söll und dänn d Dörfer Pfäfers und Valens mitenand verbindet; während em Bou isch de Termin zum d Brugg iizweje in Summer 2017 gleit wore. Vom 9. bis am 11. Juni 2017 ischt e grosses Fäscht uf de Bogebrugg zur Eröffnig duregfüert wore. Am 22. Juni hät me dänn d Brugg noch ere Fiir em Vercheer öbergee[8] und sit em 8. Juli gits e Postautolinie, wo öber d Brugg füert.[1]

Gallerii[ändere | Quälltäxt bearbeite]

D Baustell im November 2013:

D Baustell im 2014 und 2015:

D Baustell im 2016:

d Baustell aafangs September 2016
de erscht Belaag isch Endi Oktober 2016 iibaut wore

De Chrane uf de Valenser Site isch scho abmontiert, d Fahrbahnplatte erstellt, d Montage vo de Laitmuure scho fascht fertig und a de Umgebigsarbete händ s au scho aagfange. Endi Oktober isch dänn de Belaag iibaut wore und es isch bekannt wore, as es vom 9. bis 11. Juni 2017 es Bruggefäscht under em Motto «Brugge verbinded» söll gee, di offiziell Eröffnig segi för de 22. Juni 2017 vorgsee.[9]

Liniefüerig vom Postauto[ändere | Quälltäxt bearbeite]

Wil d Strooss, wo öber d Bogebrugg füert, uf de Sitte vo Pfääfers ersch e Stuck underhalb vom Dorf i Richtig Bad Ragaz uf d Verbindigsstrooss Ragaz-Pfääfers tröfd, dörf s Postauto bim Gebiet Bovel vo de Brugg uus is Dorf Pfääfers und umbekehrt fahre. Da Ströösseli isch gmacht wore för d zuefahrt zu de Baustell uf de Pfääferser Sitte und dienet jetzt em Postauto und em landwirtschaftliche Verchehr. D Schüeler vo Valens, wo uf Pfääfers i d Oberstufe gönd, händ früener mit em Postauto uf Ragaz abi, döt une umstiige und äne wider ufi fahre möse.

Varia[ändere | Quälltäxt bearbeite]

«Die unsichtbare Brücke»[ändere | Quälltäxt bearbeite]

Im 1995 hät de damalig Katechet vo Vättis, de Albert Wicki, zäme mit em Oswin Welter und de Jugendverain vo Pfääfers und Valens, en Film mit em Titel «Die unsichtbare Brücke» drait. Es isch do d Zit gsi, wo d Schüeler vo Valens neu händ müese uf Pfääfer öberi i d Oberstufe. E Brugg öber d Tamina, wo di chörzischt Verbindig gsi wär, isch dozmol no en Utopii gsii. Me hät dä Film am Bruggefäscht, wo under em Motto "Brücken verbinden" gstanden isch, wider chöne aaluege.[10]

Helm-Verstaigerig[ändere | Quälltäxt bearbeite]

Am Bruggefäscht isch au de Helm, wo de Hochsailakrobat Freddy Nock bi de Grundstailegig aagha hät, vertstaigeret worde. De Erlös isch för d Sanierig vom Sportplatz Rietli z Pfääfers dänkt gsii.[11] Erstaigered hät dä gschichtsträchtig Helm schliesslich de Albert Wicki, Mitiniziant vo obe gnänntem Film.[12]

Weblink[ändere | Quälltäxt bearbeite]

 Commons: Taminabrücke – Sammlig vo Multimediadateie

Fuessnoote[ändere | Quälltäxt bearbeite]

  1. 1,0 1,1 Grösste Bogenbrücke der Schweiz eröffnet Artikel im Bund vom 9. Juni 2017
  2. Widerstand gegen Brücke wächst (Memento vom 25. Juni 2016 im Internet Archive) Wiler Zeitung, Artikel vom 26. Oktober 2010
  3. Tamina-Brücke kann gebaut werden (Site cha nüme abgrüeft wärde; Suche im Webarchiv)[1] [2] Vorlage:Toter Link/drs.srf.ch Regionaljournal Ostschwiz vo Radio DRS, Sändig vom 1. Dezember 2010
  4. Regierung gibt grünes Licht für die Taminabrücke südostschweiz.ch, Artikel vom 23. Mai 2012
  5. Vorarbeiten für die Taminabrücke Pfäfers–Valens südostschweiz.ch, Artikel vom 26. September 2012
  6. Ungesichert auf dem Seil über die Taminaschlucht tagesanzeiger.ch, Artikel vom 28. März 2013
  7. Bogen der Taminabrücke geschlossen (Memento vom 4. März 2016 im Internet Archive) Mittailig vom 28. März 2015 uf de Website vom Kanton Sanggalle
  8. Die 260-Meter-Verbindung ist offen Artikel uf srf.ch vom 22. Juni 2017
  9. Taminabrücke Valens - Pfäfers (Taminabogen) uf pfaefers.ch, abgruefen am 17. November 2016
  10. Die unsichtbare Brücke (Site cha nüme abgrüeft wärde; Suche im Webarchiv)[3] [4] Vorlage:Toter Link/www.taminataler-brueckenfest.ch uf taminataler-brueckenfest.ch, abgruefen am 2. Augschte 2017
  11. Helm-Auktion von Extrem-Artist Freddy Nock (Site cha nüme abgrüeft wärde; Suche im Webarchiv)[5] [6] Vorlage:Toter Link/www.taminataler-brueckenfest.ch uf taminataler-brueckenfest.ch, abgruefen am 2. Augschte 2017
  12. Taminabrücke besteht Belastungsfest (Site cha nüme abgrüeft wärde; Suche im Webarchiv)[7] [8] Vorlage:Toter Link/www.taminataler-brueckenfest.ch uf taminataler-brueckenfest.ch, abgruefen am 2. Augschte 2017