D Joggeli-Arena

Us der alemannische Wikipedia, der freie Dialäkt-Enzyklopedy
St. Jakob-Arena
D Joggeli-Arena vo usse
Daate
Ort Baasel, Schwiz
Koordinaten 613572 / 265306Koordinate: 47° 32′ 18″ N, 7° 37′ 8″ O; CH1903: 613572 / 265306
Äigedümer Kanton Basel-Stadt
Bedriiber Kanton Basel-Stadt
Aafang vom Baue 2001
Eröffnig 12. Oktober 2002
Oberflechi Halleniisfäld
Chöste 25 Millione Franke
Archidekt Zwimpfer Partner und Berrel
Kapazidäät 6'600(doodrvo 4'200 Sitzblätz)
Spiilflechi 30 m x 60 m = 1800 m²
Veräin

EHC Basel (2002-2014), EHC Basel/KLH (sit 2014)

D Joggeli-Arena isch en Iissporthalle z Baasel und s Häimstdion vo EHC Basel/KLH.

D Laag[ändere | Quälltäxt bearbeite]

D Joggeli-Arena lit in dr Brüügliger-Eebeni und isch Däil vom Joggeli-Sportzentrum, wo au s grösste Schuttstadioon in dr Schwiz, dr Joggeli-Park, und d Joggelihalle frzueghööre. D Arena lit uf em Boode vo dr Gmäind Münchestäi, befindet sich aber brad usserhalb vo dr Stadt Baasel. D Iishalle isch vom Verkeer us seer guet aagschlosse: D Dramlinie 14 vo der Baasler Verkeers-Betriib (BVB) verbindet s Areal mit dr Innestadt, d Buslinie 36 mit em Baadische Baanhoof.

Nutzig[ändere | Quälltäxt bearbeite]

D Joggeli-Arena vo dinne

S Stadion het e Fassigsvermööge vo 6'600 Zueschauer. Die Kapazidäät bestoot us 4'200 Sitzbläz und 2'400 Steeblätz.

D Arena cha s ganze Joor lang brucht wärde und äignet sich für die mäiste Iissportarte wie Iishockey, Iiskunstlauf, Iisdanz, Sünchroniiskunstlauf, Schortträck und Iislaufe. Nume wäärend dr zwäite Helfti vom Juni und em ganze Juli het s kä Iis in dr Halle.

Usserdäm finde Konzärt, Iisrewü, Iisdiscos und kulturelli Events in dr Halle statt.

Gschicht[ändere | Quälltäxt bearbeite]

Sit 1980 het mä sich z Baasel überläit, e nöiji Iishalle z baue. Dr Baasler Nazionalroot Johannes Randegger, dr ehemoolig Iishockeyspiiler Pio Parolini und dr Baasler Regierigsroot Christoph Stutz häi 1998 e brivati Grubbe gründet zum s Brojekt ändlig z verwirklige. 1999 isch d Gnosseschaft Joggeli-Arena ins Lääbe grueft worde und die het öbbe 1,2 Millione Franke inwestiert. Au dr Bund het zwäi Millioone zuegschosse, d Kantöön und Gmäinde zämme 8,2 Millioone und die Industrielle Wärk Baasel 4,5 Millioone Schwizer Franke. Dr Räst isch fremdfinanziert worde. In dr Baufaase 2001–2002 si 119'000 m³ verbaut worde. D Blaanig und d Usfüerig isch in de Händ vo de Archidekde Zwimpfer Partner und Berrel gsi. Bim erste Iishockeyspiil in dr Arena am 12. Oktober 2002 het dr EHC Baasel gegen e EHC Olte vor usverchaufte Räng 4:0 gwunne. 2006 het d Curling-Öiropamäisterschaft 2006 z Baasel in dr Joggeli-Arena stattgfunde.

Weblingg[ändere | Quälltäxt bearbeite]