Spiesshof

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Dr Spiesshoof
Dialäkt: Baseldütsch

Dr Spiesshoof isch e historischs Geböid am Höibarg 5 und 7 z Baasel. Es isch äins vo de Baasler Kulturgüeter, wo nazionali Bedütig häi.

Gschicht[ändere | Quälltäxt bearbeite]

S Huus, wo im 13. Joorhundert uf däm Gländ gstande isch, het «Huss zuom Spiess» ghäisse, villicht noch em Burchard vo Spietz, wo 1294 zum Lienertsstift choo isch und dört Chällermäister und Kantor gsi isch. 1546 het dr David Joris under em Naame Johann vo Brügge s Huuf kauft. Dr Joris isch e Widerdöifer gsi und dr Aafüerer vo dr müstische Sekte vo de Davidite, wo vor dr Verfolgig uf Baasel gflüchdet isch und sich doo as Zwinglianer usgee het. Wo dr Joris drei Dääg noch sinere Frau am 28. August 1556 gstorbe isch, si die bäide in dr Lienertskiirche begraabe worde. Wo d Baasler aber denn uusegfunde häi, wär er wirklig gsi isch, häi si em posthum dr Brozäss gmacht und sini Liiche am 13. Mai 1559 usgrabt, köpft und zämme mit sine Büecher verbrennt. Mä verzelt, ass dr Joris immer no mit sim Chopf under em Arm oder vo zwäi Dogge begläitet im Huus wurd umgoo.

Dr Rönessansflüügel vom Spiesshoof goot uf e Handelsherr Balthasar Irmi zrugg, won en zwüsche 1585 bis 1590 vom berüemte Baumäister Daniel Heintz het lo baue.[1] Dr Barockflüügel het dr Niklaus Harscher baut, nochdäm er dr Spiesshoof 1723 für 10'500 Pfund vom Jakob Birer und däm sinere Frau Katharina Merian kauft het. 1853 het die Schwizerischi Centralbaan dr Spiesshoof kauft und wo 1902 d Iisebaan verstaatligt worde isch, isch us em e Verwaltigsgeböid vo dr SBB worde. 1946 isch dr Spiesshoof umfassend renowiert worde und vo 1986 aa het mä si Fassaade ernöijeret.[2]

Hüte si en Aawaltskanzlei und Woonige din.

Fuessnoote[ändere | Quälltäxt bearbeite]

  1. Renaissancepalast sorgfältig renoviert vom 24.12.2010 uf dr Website vo dr bz.ch
  2. Der Spiesshof am Heuberg uf altbasel.ch, abgrüeft am 18. Februar 2014