Sergius IV.

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
dr Sergius IV., Darstellig us em 19. Jh. in dr Basilika Sankt Paul vor dr Muure

Dr Sergius IV. (* um 970 z Rom; † 12. Mai 1012) isch vum 31. Juli 1009 bis zue sym Dood Papscht gsii.

Lääbe[ändere | Quälltäxt bearbeite]

Voreb er sy Amt aadrätte het, isch sy Name Pietro gsii. Eso het au sy Vater ghaiße, wu ne Schuemacher z Rom gsii isch. Dr Sergius soll in syre Juged dr Schimpfname „Söuschnure“ (bucca porci) ghaa haa. Mit däm Byname isch er au in dr Chronik vum Thietmar vu Merseburg ufgfiert.

Vor sym Amtsaadritt isch er vu 1004 bis 1009 Bischof vu Albano gsii, wäge däm wird er au Pietro da Albano gnännt. Iber d Umständ vu syre Beruefig un Wahl zum Papscht waißt mer nyt.

Dr Sergius soll si sy ganz Pontifikat lang unter em Yyfluss vum remische Patrizier Johannes II. Crescentius gege d Dominanz vum remisch-dytsche Chenig Heinrich II. z Rom gwehrt haa. Är het di rächtlige Bezieige zwische Chleschter un Bischef nei gornet un in ere Hungersnot s aifach Volk unterstitzt. Dr Sergius, ender ain vu dr schwache Päpscht, isch im Petersdom vergrabe.

Wu d Grabeschilche z Jerusalem dur dr Kalif al-Hakim anne 1009 gschlisse woren isch, soll dr Sergius as erschte Papscht in eme Schrybe derzue ufgruefe haa, d Muslim us em Hailige Land z verdrybe. D Grabeschilche isch erscht anne 1055 wider ufböue wore. S Chryzzugsmanifescht, au anne 1682 entdeckt woren isch, giltet unter Hischtoriker im Allgmaine as Felschig, wu in dr Zyt vum Erschte Chryzzug im Chloschter Saint-Pierre de Moissac verfasst wore sei, go dr Chryzzugufruef vum Papscht Urban II. dogmatisch sterke.[1] Anne 1935 het dr Hischtoriker Carl Erdmann die Uffassig kritisiert,[2] syni Aasichte sin aber mittlerwyli widerlait.

Literatur[ändere | Quälltäxt bearbeite]

  • Ernst Pulsfort: Sergius IV. In: Biographisch-Bibliographisches Kirchenlexikon (BBKL). Band 9, Herzberg 1995, ISBN 3-88309-058-1, Sp. 1441–1442.

Weblink[ändere | Quälltäxt bearbeite]

 Commons: Sergius IV. – Sammlig vo Multimediadateie

Fueßnote[ändere | Quälltäxt bearbeite]

  1. Tuomas M. S. Lehtonen (Hrsg.): Medieval history writing and crusading ideology. Helsinki 2005. Jonathan Riley-Smith: The First Crusade and the Idea of Crusading. London 1986.
  2. Carl Erdmann: Die Entstehung des Kreuzzugsgedankens. Stuttgart 1935, ISBN 3-534-00199-0.
Information icon.svg Dä Artikel basiert uff ere fräie Übersetzig vu dere Version vum Artikel „Sergius_IV.“ vu de dütsche Wikipedia. E Liste vu de Autore un Versione isch do z finde.