Schnyderli

Schnyderli (Alburnoides bipunctatus)

Systematik

Ordnig:	Charpfenartigi (Cypriniformes)
Familie:	Charpfefisch (Cyprinidae)
Underfamilie:	Leuciscinae
Gattig:	Alburnoides
Art:	Schnyderli

Wüsseschaftlige Name

Alburnoides bipunctatus

Bloch, 1782

S Schnyderli (Alburnoides bipunctatus; alemanischi Näme) isch e aapassigsfääige Süesswasserfisch, wo wenig Aasprüch uf s Gwässer het, wos lebt.

Uussie

S Schnyderli isch e chliine silbrige Fisch, wo 13 bis 16 cm lang werd und öppe 30 Gramm wögt. S hett uf de Siite zwoo Raie mit dunkle Pünkt, wo zäme wiene Noot uusgsiend, drum sin Name. D Undersiite isch wiisslich, d Obersiite het e Grüestich, d Flosse sind eener geel oder wiiss.

Verbraitig

S Schnyderli chunnt im europäische Bineland vor, au i de Törkai, im Irak und im Iran isch s haimisch. S lebt i suurstoffriiche Flüüssgwässer mitere starche Ströömig, won e chiisige Grund hend.

Lebeswiis

S Schnyderli isch e Schwarmfisch wo i de Ströömig vom Fluss stoo bliibt und Alge, Plankton, Insektelaarfe und Chliichrepsli fresst. S gumpet aber au usem Wasser um chliini Tierli am Uufer z schnappe. D Laichzitt goot vom April bis in Juni binere Wassertemperatur zwösched 14 und 24 Grad. S Wiibli lait denn 800 bis 3000 Aier uf de chiisigi Grund. Schnyderli wered im zwaite Joor gschlechtsriiff und chönd 8 Joor alt were.

Büecher

Stefan Ineichen (Hrsg.): Stadtfauna, 600 Tierarten der Stadt Zürich; Bern 2010; ISBN 978-3-258-07561-7

Weblink

Schneider (Fisch) uf Fishbase.org (englisch)