Lehemer Weiherschloss

Weiherschlessli

S Lehemer Weiherschloss isch e bfeschtigte Herrehof im Fryybeger Stadtdail Lehe in dr Bundschuestroß rund 60 Meter sidlig vu dr barocken Chilche St. Cyriak.

Gschicht

Zum erschte Mol gnännt wird dr Lehemer Herrehof anne 1478 as „Curtis zu Leheim“, wu dr Jakob Widergrün von Staufenberg s Dorf Lehe mit em Weiherhuus vum Erzherzog Sigismund as eschtrychisch Läche iberchuu het. Villicht beziet sich au e Urkund vu anne 1427 uf s Weherschlessli, wu dr Herzog Friedrich vu Eschtrych dr Heinrich Bangergeben vu Fryybeg z Lehe mit „Stock, Haus und Geseß“ beläänt het. Wär s Wasserschloss het böue loo, losst sich nit noovollzie. Wahrschyns stammts us dr Zyt no dr Zähringer, wel s z Lehe im 11. Un 12. Johrhundert nit zue dr Bildig vun eme Ortsadel chuu isch. No dr Widergrün isch s Schloss im Bsitz vum Balthasar vu Blumeneck gsii. In dän syre Zyt isch au anne 1513 dr Ufstand vum Bundschue z Lehe gsii. Im Verzaichnis vu dr Hyyserr, wu im Buurechrieg anne 1525 zerstert wore sin, isch s Wasserschloss wahrschys as Huus vu dr Witfrau vum Balthasar vu Blumeneck ufgfiert (item i hus ist junkers Baltisirs frawen). D Noofolger vu dr Blumeneck, d Familie von Stadion het s Dorf, s Schloss un dr Burgstall 1587 an d Stadt Fryybeg fir 24000 Gulde verchauft. In dr Verchaufsurkund wäre au d Grebe, dr Weiher un e Fron- un Schutzhof mit neiböute Staigebei gnännt. Dää Hoft git s hite no un isch as Hof zu tutsch bekannt. Noch em Verchauf isch s Dorf vu dr Stadt verwaltet wore. S Weiherschlessli wird im Hyyserverzaichnis vu 1863 uubewohnbar un nume Hochhaus gnännt. No dr Instandsetzig isch s d Unterchumpft vum stedtische Jeger z Lehe gsii. S Lehemer Schlessli isch anne 1870 an e Privatmann verchauft wore un isch au hite no bewohnt un in Privatbsitz

Böu

Dur d Fänschtergwänd, s Vollwalmdach un syni drei Fänschterachse wirkt s wie ne Barockgebei. Dr dreigschossig Böu mit syym durmartige Ufböue losst aber uf e dytlig elteri Böusubschtanz schließe. E wytere Hiiwys dodruf isch, dass dr eschtlig Dail vum Gebei massiver böue isch, wie fir e Durm mit ere Greßi vu 10 x 10 Meter. Iber dr Dire isch s Bindeschild z sääne, wu d Woppe vu Fryybeg un Vordereschtrych zaigt.

D Bfeschtigung isch vu dr Aalag här e Dief- bzw. e Wasserburg gsii. S Wasser vum eme Dreisamarm isch um s Herrehuus gflosse, wu wahrschyns uf ere chlaine Insle as Uuslaifer vum Lehemer Bärgli e weng hecher gstanden isch. Dr Zuegang zue däre Aalag, wu mit ere zeunige Muure umgee gsii isch, isch iber e Bruck an dr Nordsyte här gsii.

• 
• 
• 

Literatur

• Alfons Zettler, Thomas Zotz: Die Burgen im mittelalterlichen Breisgau, I. Nördlicher Teil: Halbband L-Z. Jan Thorbecke Verlag, Ostfildern 2006, ISBN 978-3-7995-7365-8, S. 272-274.
• Oberrhein, 66 Burgen von Basel bis Karlsruhe, Heiko Wagner, Theiss Verlag
• Lehener Geschichte und Geschichten, Herausgeber Stadt Freiburg Ortsverwaltung Lehen, 1989

Weblink

 Commons: Lehemer Weiherschloss – Sammlig vo Multimediadateie

48.0168867.801965

Dä Artikel basiert uff ere fräie Übersetzig vum Artikel „Schloss_Lehen_(Freiburg)“ vu de dütsche Wikipedia. E Liste vu de Autore un Versione isch do z finde.