Schlacht vo Chaironeia

Schlacht vo Chaironeia
Deil vo: Makedonischi Chrieg
D Grieche in root, d Makedonier in blau.
Datum 2. August 338 v. d. Z. Ort bi Chaironeia Usgang Entschäidende makedonische Siig Folge Makedonie het d Hegemonii über Griecheland übernoo. Im Joor druf het dr Philipp II. dr Korinthisch Bund gründet, wo alli griechische Poleis usser Sparta Mitgliider worde si.
Konfliktparteie
Makedonie	Athen Theebe
Befählshaber
Philipp II.	Chares
Truppesterki
öbbe 30'000 Maa	öbbe 30'000 Maa
Verlust
umbekannt	öbbe 2'000 Dooti öbbe 8'000 Gfangeni

D Schlacht vo Chaironeia im August vom Joor 338 v. d. Z. het mit ere Niiderlaag vo dr Allianz um Athen und Theebe gändet und Makedonie zur Hegemonialmacht in Griecheland gmacht. D Allianz vo de griechische Poleis isch zum e groosse Däil entstande, wil dr athenisch Reedner und Politiker Demosthenes wäärend Joor vor Makedonie gwarnt het.

D Schlacht

Die makedonischi Armee, wo wie die griechischi öbbe 30'000 Maa stark gsi isch isch under em Befääl vom Philipp II. gstande. Däm si Soon Alexander het do zum erste Mol e Kommando ghaa und het die berittene Drubbe uf em lingge Flüügel kommandiert. Es wird gschetzt, ass d Grieche uf iirem lingge Flüügel öbbe 10'000 athenischi Hoplite ufgstellt häi, wo aber nume wenig Erfaarig ghaa häi, im Zentrum si die Verbündete und Söldner gsi und d Hauptarmee het us de thebanische Drubbe bestande mit dr berüemte Häilige Schar (300 Elitesoldate) uf em üssere rächte Flüügel.

D Athener und iiri Verbündete si am Aafang vo dr Schlacht im ene zimlige Duurenander voorgruggt, wäärend sich die makedonischi Falanx gordnet langsam zruggzoge het. D Drubbe vo de Thebaner si zerst in Formazion bliibe, und eso het sich zwüsche iine und de Athener e Lugge bildet. Dr Alexander isch mit sine Riter vom lingge Flüügel in die Lugge iine und noch iine isch au die makedonischi Falanx wider vorgruggt. E Däil vo de Grieche häi sich denn zruggzooge oder si gflüchdet. Die thebanischi Häiligi Schar het sich witer gschlaage und het fast 250 vo iire 300 Maa verloore.

D Niiderlaag isch verheerend gsi. D Athener und d Thebaner häi im Ganze öbbe 2'000 Maa verloore und 4000 Hoplite si gfange gnoo worde. D Makedonier häi nume weenig Dooti ghaa. Chaironeia isch im Alexander si erst grooss Siig gsi, aber es gseet nid us, wie wenn dr Philipp iin drfür uszäichnet hätti.

Noch dr Schlacht

D Makedonier häi d Grieche noch dr Schlacht zerst eender schonend behandlet. Athen het sini demokratischi Verfassig döfe bhalte; erst noch dr Niiderlaag im Lamische Chrieg 322 v. d. Z. häi d Makedonier si zwunge, d Demokratii abzschaffe. Theebe het aber e Strooffriide überchoo mit ere makedonische (oligarchische) Bsatzig. Im Herbst 335 v. d. Z. het dr Alexander d Stadt lo zerstööre, wil si noch em Mord am Philipp dänggt het, ass si d Makedonier jetz chönni schloo. Wiso Athen so guet behandlet worde isch, isch woorschinlig drvo choo, ass dr Philipp wäge sinere panhellenische Propaganda Athen nid het welle zerstööre und woorschinlig au nid het welle, ass e Machtvakuum wurd entstoo. Au het er d Athener wäge iirer Flotte guet für dr blaanti Persiefäldzuug chönne bruuche.

Litratuur

• Peter Green: Alexander of Macedon. Nachdruck, Berkeley u. a. 1991, S. 68ff.
• Siegfried Lauffer: Alexander der Große. 3. Ufl., Münche 1993, S. 32f.

Dä Artikel basiert uff ere fräie Übersetzig vum Artikel „Schlacht_von_Chaironeia“ vu de dütsche Wikipedia. E Liste vu de Autore un Versione isch do z finde.