Korinthisch Bund

S Königriich vo Makedonie noch em Dood vom Philip II. Dr Korinthisch Bund isch in gäl.

Dr Korinthisch Bund isch ä Bündnis vo alle griechische Schdaate usser Schbarta gsi, wo 337 vor dr Zitewändi z Korinth abgschlosse worden isch.

Dr Bund isch de Grieche vom König Philip II. vo Makedonie ufzwunge worde, nochdäm d Athener und Thebaner d Schlacht vo Chaironeia im August 338 gege d Makedonier verlore hai. Dr Füehrer vom Bund isch dr makedonisch König gsi. Alli allgemeine Aglägeheite, au die ussebolitische, si im „Root vo de Grieche“ z Korinth behandlet worde. Dä Root het us Delegierte vo alle Bündnispartner beschdande, und jede Schdaat het Delegierti broportional zu siiner militärische Schderki gha. D Autonomii vo alle Schdaate isch garantiert worde.

An dr erschde Versammlig im Johr 337 het dr Bund beschlosse, Chrieg gege Persie z mache, und het dr Philipp II. zum Afüehrer (Hegemon) vo dr Armee gwehlt. Won er aber 376 ermordet worden isch, isch si Sohn, dr Alexander III. (dr Grooss) Füehrer vom Bund worde. D Begeischderig vo de Grieche für d Blän vo de Makedonier het sich in Gränze ghalte, und ihri Biidräg zu de Kampanie vom Alexander si entschbrächend chlii bliibe.

In Griecheland sälber het dr Bund d Thebaner noch ihre Ufschdänd 336 und 335 versklavt und ihri Gebiet an die andere Schdaate verdeilt.

Dr Korinthisch Bund isch noch em Dod vom Alexander em Groosse 323 vor dr Ziitwändi ufglöst worde. Drei Johrzähnt schböter isch er vom Demetrius II. im Johr 302 für churzi Ziit widr hergschdellt worde.

Quelle

• Dr Artikel "Corinth, League of" in Encyclopædia Britannica. Ultimate Reference Suite. Chicago: Encyclopædia Britannica, 2008.
• dtv-Atlas zur Weltgeschichte, Band 1, S.62ff., Deutscher Taschenbuch Verlag 1970