Dr Samson und Delila-Brunne

47.5549227.589545

Dr Samson und Delila-Brunne

Dialäkt: Baseldütsch

Dr Samson und Delila-Brunne isch e Baasler Stadtbrunne am Egge Barfüesserblatz/Stritgass. Dr Brunne stoot sit 1915 under Dänggmolschutz und zelt as e Baasler Kulturguet, wo für d Region vo Bedütig isch.

Usgsee

Dr Brunnedroog us Stäi isch achteggig (äigetlig viereggig mit abgschreegte Egge) und an dr Site stoot e chliiners Dröögli. Dr Brunnestock het e kwadratische Kwerschnitt (au mit abgschreegte Egge), isch verziert und oobedruf stoot d Skulptur vom Samson und dr Delila, wo d Delila im Samson mit ere Scheeri d Hoor abschniidet. Die bäide si noch dr Gschicht in dr Biible Liebhaber gsi. Dr israelitisch Richder Samson het dr Filistere Delila, wo zum Volk vo sine Find ghöört het, aber zerst nid welle verzelle, wiso er so stark isch, bis er s ere doch verroote het. D Delila het em druf, won er gschloofe het, sini Hoor abgschnitte, und er het si übermenschligi Chraft verloore. D Delila het denn de Filister grüeft und die häi em d Auge usgstoche und en in dr Tämpel vo iirem Gott Dagon brocht. Dört het dr Samson si Chraft zruggüberchoo und dr Tämpel zum Iisturz brocht und e Hufe Filister eso döödet.

Gschicht

1380 isch an däm Blatz e "Steblins-Brunne" erwäänt worde. Dä isch us Holz gsi und mä het en im Joor 1530 dur e nöije us Stäi ersetzt und d Figuregrubbe "Samson und Delila" oobe druf gstellt. 1846 het mä dr hütig Brunnedroog aanedoo. 1914 het dr Carl Gutknecht e Kopii vom Samson und dr Delila gmacht, und mä het s Original ins Historische Museum brocht. 1936 isch dr Brunne dört ufgstellt worde, won er hüt no stoot. 1982 het dr Ludwig Stocker non emol e Kopii gmacht.

Kwelle

• Samson und Delila-Brunnen uf brunnenfuehrer.ch
• Samson-und-Delila-Brunnen - Basel, Switzerland uf waymarking.com