Salus populi Romani

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
s Bild Salus populi Romani

Salus populi Romani isch es antiks Bild vo der Muettergottes.

Es ghört zu de choschtbare Sache i der Chile Santa Maria Maggiore z Rom. Es isch die wichtigschti Maria-Ikoone vo Rom.

«Salus populi» isch sid em vierte Joorhundert en Eeretitel vo der Jungfrau Maria. Dää latynisch Begriff bedüütet uf Dütsch «s Häil vom Volch».

S Bild isch uf ene Dafele vo Zeedereholz gmoolet, und d Kunschthistoriker wüsse, es isch mit dr Zyt es paar Mol veränderet und zmingscht teilwys übermoolet worde. D Dafele isch 117 Santimeter hööch und 79 Santimeter breit. Uf em Bild het d Maria e rooti Tunika und drüber en blaue Mantel aa, wo au iire Chopf tekt. Si treit s Jesuschindli, wo es Buech i dr Hand het und d Lüüt mit der rächte Hand sägnet.

Bi de glöibige Chrischte luegt me das Bild für öppis Wundertätigs a. Sid em sächste Joorhundert isch syni Vereerig dokumäntiert. Von es paar Päpscht weiss me, wie si vor em Mariebild sin go bätte wäge schlimme Süüchine: Dr Papscht Gregor dr Gross anne 593, wo z Rom d Pescht gsi isch; der Papscht Gregor dr Sächzääti anne 1837 gäge d Cholera; dr Papscht Franziskus am 15. März 2020 für s Ändi vo der wältwyte Koronavirus-Pandemy 2020.

Literatur[ändere | Quälltäxt bearbeite]

  • Gerhard Wolf: SALUS POPULI ROMANI. Die Geschichte römischer Kultbilder im Mittelalter. Weinheim 1990. ISBN 3-527-17717-5.