Rheinfieber

Rheinfieber isch e Färnseh-Show gsii, wu 2023 uf France 3 uusgstrahlt woren isch. S isch e trinationali Late Night Show gsii, wu fascht uusschließlig uf Alemannisch („Elsässisch, Badisch un Schwyzerdütsch“) gschwätzt woren isch, per Untertitel het mer s no uf Franzesisch ibersetzt.

Moderiert het d Sändig d Bénédicte Keck us em Elsass. Iri Gescht sin dr sidbadisch Comedian un Internet-Influencer Cossu us em Kinzigdal un d Schwyzer Schauspileri un Comedian Simone Kern vu Züri gsii.

Mit däre Comedyshow het mer welle ufzaige, wie di alemannische Dialäkt d Mänsche in dr Region häne un däne vum Rhyy iber d Gränze verbinde. Mer het si mit Parodie, Sketch un Spiil iber Unterschid un Gmainsamkaite im Dreyeckland amüsiert, iber Alldagsprobläm un Skandal z Frankrych, z Dytschland un in dr Schwyz, iber Sache, wu d Lyt begaischtere oder by ne Härzchlopfe, Fieber, Schwaißuusbrich oder Nesseluusschleg uuslese duet.

D Sändig isch am 26. April ufzaichnet wore. Si isch us eme Zämenarbet vu France 3, em dytsche SWR un em schwyzerische SRF entstande un isch am 25. Juni 2023 uf France 3 uusgstrahlt wore.

Weblink

• Rheinfieber, le show d’humour exceptionnel pour rire de notre quotidien de transfrontalier, France 3, 20. Juni 2023
• Viola Maury: Rheinfieber: drei Dialekte, eine Late-Night-Show, SWR, 24. Juni 2023