RappazMuseum

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
S Schild am RappazMuseum
Dialäkt: Baseldütsch

47.56177.5904Koordinate 47° 33′ 42″ N, 7° 35′ 25″ O; CH1903: 611423 / 267899

S RappazMuseum isch e Museum im Huus Klingedaal 11 im Gläibaasel wo im Baasler Grafiker und Künstler Rolf Rappaz gwidmet isch. Es isch vom Mändig bis am Donnstig vom zääni am Morge bis am fümfi am Nomiddaag offe.

S Museum[ändere | Quälltäxt bearbeite]

D Idee isch vom Baasler Künstler Bruno Gasser gsi, und s Museum isch 2008 im ehemoolige Ateliee vom Rappaz ufdoo worde. Uf sine drei Stöck wärde im Künstler si Wärk zäigt, wo us aagwandter Grafik und freier Kunst bestoot. Usser dass es Wärk vom Rappaz usstellt, isch s Huus au e Kulturzentrum, wo vor allem d Kunst und d Kultur vo dr Regioon im Bligg het.

S Geböid[ändere | Quälltäxt bearbeite]

S Huus Klingedaal 11 isch äins vo de eltiste Geböid im Gläibaasel. D Liigeschaft isch us em 11. Joorhundert bekannt. Wo 1274 s Klingedaalklooster, denn no s «Kläine Klingedaal», gründet worde isch, isch s Door vom Klooster grad näben em Huus Klingedaal 11 baut worde, wo vorhär emol eläi gstande isch. D Wääberei vom Klooster isch drii khoo und vo deere het d Wääberstrooss nääbedra iire Naame. Us deere Zit het s im Bardeer vom Huus immer non e Sodbrunne.

E Generazioon noch dr Reformazioon isch s Klooster 1557 ändgültig zuedoo worde, und d Geböid si für Gwärb und Laagerig benützt worde und au zum Drubbe iizkwardiere.

D Liigeschaft Klingedaal 11 isch lang in brivate Händ gsi, bis si im 17. Joorhundert in Bsitz vo dr Stadt khoo isch. Am Aafang vom 19. Joorhundert isch s Huus vollständig renowiert worde, het e klassizistischi Fassaade überkhoo und e groossi Biidermäier-Stääge und isch en Altershäim für d Müller vo dr Klingedaalmüüli nääbedraa worde.

Kwelle[ändere | Quälltäxt bearbeite]