Dr Rangschierbaanhoof Baasel

Us der alemannische Wikipedia, der freie Dialäkt-Enzyklopedy

Koordinate: 47° 32′ 3″ N, 7° 38′ 51″ O; CH1903: 615728 / 264846

Dialäkt: Baseldütsch
Dr Rangschierbaanhoof 1968

Dr Rangschierbaanhoof Baasel uf em Muttezerfäld isch äine vo de grösste Rangschierbaanhööf in Öiropa. Es isch e Gränzbaanhoof, wo d Güeterzüüg im Waagelaadigsvercheer vo und uf Frankriich und Dütschland ufdäilt und noch de Bestimmigsort zu nöije Züüg zämmegstellt wärde.

Gschicht[ändere | Quälltäxt bearbeite]

D Reorganisazioon noch dr Gründig vo dr SBB[ändere | Quälltäxt bearbeite]

Dr Bahnhoof Basel het as Gränzbaanhof immer e bsundrigi Bedütig ghaa. Scho zr Zit vo de Brivaatbaane het s z Baasel e Güeterbaanhoof gee, dr Rangschierbaahnhoof Wolf vo dr Schwizerische Centralbaan (SCB), wo 1875 eröffnet worde isch. Wo 1902 d Brivatbaane verstaatligt worde si, het die nöi SBB (Schweizerische Bundesbahnen) d Bauwärk und s Rollmaterial vo fümf Baane müesse veräihäitlige. As Däil vo dere Reorganisazioon het mä beschlosse, dr Wolf z ersetze, wo für dr waggsend Güetervercheer z chlii worde isch.

Dr Rangschierbaanhoof Baasel I uf em Muttezerfäld[ändere | Quälltäxt bearbeite]

Dr nöi Rangschierbaahnhoof isch noch ere lange Blaanigszit vo 1924 bis 1928 im Gmäindigebiet vo Muttez baut worde. Won er 1929 eröffnet worde isch, isch er dr grösst Schwizer Rangschierbaanhoof gsi mit ere Kapazidäät vo 3000 Wääge. Er isch as Gfällsbaanhoof konzipiert gsi, das häisst, mä het nume d Wäiche richdig müesse stelle und denn d Güeterwääge loo aaberolle, zum e nöije Zuug zämmezstelle. Aber anstatt vom ene zentraale Stellwärk het mä, uf Druck vo dr Kräisdiräkzioon, meereri Stellwärk für die verschiidene Abschnitt ufgstellt, und die häi denn per Röörebost oder Lutsprächer mitenand müesse kommuniziere. D Signaal und d Wäiche si elektrisch gstüürt gsi. Bi de Stellwärk unde am Ablaufbärg si hüdraulische Gläisbrämse installiert worde, wo Iisebalke vo dr Site an d Waagereeder bresst und eso gstoppt häi. Die ganzi Rangschieraalaag isch vier Kilometer lang und 70 bis 200 Meter bräit gsi.

S Hauptdienstgeböid[ändere | Quälltäxt bearbeite]

S Hauptdienstgeböid vom Rangschierbaanhoof

1931 isch s Hauptdienstgeböid fertig worde. Es isch vom Archidekt Alfred Ramseyer, em Sekzionsschef vom Hochbaubüro vo dr SBB-Kräisdiräkzioon z Luzärn blaant worde. Es het e sträng sümmetrische Ufbau mit eme Uuredurm in dr Middi. S Geböid isch hüte dänggmolgschützt.

D Automatisazioon[ändere | Quälltäxt bearbeite]

Am Ändi vo de 1960er Joor het d SBB dr Ablauf in dr Richdigsgrubbe afo automatisiere. Die middlere Göäis, wo am hüfigste brucht worde si, het mä mit elektrodünamische Brämse usgrüstet. Si si mit Kompiuter gstüürt worde und häi d Wääge mit eme starke Magnetfäld uf de Gläis abbrämst, so dass es käi Verschliss me gee het. Zwüsche de Schiine si Förderwääge montiert worde, wo d Güeterwääge zämmegschoobe häi, und mä sä nume no het müesse zämmekupple. Dank dene Automatisierige isch d Kapazidäät vo dr Aalaag vo 3500 uf 5000 Wääge bro Daag gwaggse.

Dr Rangschierbaanhoof Baasel II[ändere | Quälltäxt bearbeite]

In dere Zit het mä au d Aalaag Baasel II afo baue, wo scho lang blaant gsi isch. 1976 isch im Norde vo Baasel I d Erwiterig Baasel II in Betriib gnoo worde. Die Aalaag wird vo zwäi Stellwärk automatisch gstüürt. Uf de Gläis hets nume no Personal, wo d Güeterwääge zämmekupplet oder entkupplet.

Im Joor 2008 het d SBB beschlosse, die alti Basel I-Aalaag z automatisiere.

Kwelle[ändere | Quälltäxt bearbeite]