R.E.M.

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
R.E.M.
R.E.M. bìm ne Konzärt z Padua, Italie, 22. Juli, 2003. Vo rächts nach lìnggs: dr Mike Mills, dr Michael Stipe, dr Tour ù Sessiondrummer Bill Rieflin ù dr Peter Buck.
R.E.M. bìm ne Konzärt z Padua, Italie, 22. Juli, 2003. Vo rächts nach lìnggs: dr Mike Mills, dr Michael Stipe, dr Tour ù Sessiondrummer Bill Rieflin ù dr Peter Buck.
Date
Härkumft Athens, Georgia, USA
Genre Alternative Rock
College Rock
Jangle Pop
Aktiv 1980 bis 2011
Label Hib-Tone, I.R.S., Warner Bros.
Website www.remhq.com
Mitgliider
Michael Stipe
Peter Buck
Mike Mills
Früehneri Mitgliider
Bill Berry
Dialäkt: Bärndütsch

R.E.M. ìsch en amerikanischi Rockband vo Athens, Georgia gsìì. Si ìsch vom Sänger Michael Stipe, em Gitarrìscht Peter Buck, em Bässeler Mike Mills ùn em Schlagzüger Bill Berry ggrǜndet worde. R.E.M. ìsch eini vo de erschte erfolgriiche alternativ-Rockbands ǜberhoupt gsìì. Des vor allem wäg dr tschänglige Spììlwiis vom Buck ù de ùdütleche Tegschte vom Stipe.

Gschicht[ändere | Quälltäxt bearbeite]

1981 hei si ìri erschti Single, «Radio Free Europe», bìm ùnabhängige Label Hip-Tone useggää. Chùrz drufabe si si vo I.R.S. Records under Vertrag gno worde, wo si 1982 d EP Chronic Town ùn es Jaar speeter ìres Debut-Album Murmur useggää hei. Säb Album ìsch bì Kritiker seer guet aacho. Ǜber di nächschte Jaare hei si ìre Ruef chönne witer usboue. Daas dank witere Albene, fasch ùnunterbrochnigem Tuure ù der Understǜzig vo College-Radiostatione. Nachdäm si scho meereri Jaar ìm Undergrund hei Erfolg gha, hei si 1987 mit dr Single «The One I Love» ìre erscht grooss Hit glandet. Es Jaar speeter hei si bìm groosse Lable Warner Bros. Records underschrìbe ù hei aagfange, politischi ù ùmweltbedìngti Probleem bì ìrne wältwite Uftrìtte aazspräche.
Ì de früeche 1990er, wo dr alternativ-Rock langsam populäär ìsch worde, ìsch R.E.M. als Pionier vo dem Genre aagsee worde ù het sini zwöi erfolgriichste Albene Out Of Time (1991) ùn Automatic For The People (1992) useggää, wo sech rächt starch vom Toon vo de eltere Albene entfärnt hei. 1994 si si mit Monster aber wìder nööcher a ìren alt Rocksound äne choo. Drufabe hei si ds erschte Mal sìt sächs Jaar e groossi Wältturnee gstartet, wo aber vo teilwiis rächt schwääre Erchrankige vo Bandmitglider begleitet ìsch gsìì (ù.A. ìsch dr Bill Berry bìm ne Konzert z Lausanne wägem ne Ghirn-Aneurysma zämeproche). 1996 hei si e nöie Vertraag bi Warner Bros. underschrìbe, wo ne 80 Millione US$ iiprunge het. Des ìsch dennzumal dr höchst dottiert Vertraag ìr Gschicht vor Musigìnduschtrii gsìì. Ds Jaar drufabe het dr Bill Berry d Band ì frǜndschaft verlaa. Di drei räschtleche Mìtglìder hei bschlosse, aus Drüergschpann witerzmache. Soo hei si ìri Carieere o ìm nöie Jaarzäänt witergfüert ù meermals ìre Musigstiil mìt gmischtem Erfolg gänderet. Ds momentan nöischte Album Accelerate (2008) erìnneret aber wider starch a Stiil, wo si ìr zwoote Helfti vo de 1980er hei ghaa.
2007 ìsch d Band ìr Originalbsezig ì d Rock and Roll Hall of Fame ufgno worde.

Am 21. Septämber 2011 het R.E.M. uf ihrer Website bekannt gee, ass d Band ufglööst sig und ass mä sich im Guete drennt häig.[1]

Diskografii[ändere | Quälltäxt bearbeite]

  • Murmur (1983)
  • Reckoning (1984)
  • Fables of the Reconstruction (1985)
  • Lifes Rich Pageant (1986)
  • Document (1987)
  • Green (1988)
  • Out of Time (1991)
  • Automatic for the People (1992)
  • Monster (1994)
  • New Adventures in Hi-Fi (1996)
  • Up (1998)
  • Reveal (2001)
  • Around the Sun (2004)
  • R.E.M. Live (2007)
  • Accelerate (2008)
  • R.E.M. Live At The Olympia (2009)
  • Collapse Into Now (2011)

Fuessnoote[ändere | Quälltäxt bearbeite]

  1. Rockband R.E.M. gibt Trennung bekannt; Welt Online; abgrüeft am 21. Septämber 2011

Weblinks[ändere | Quälltäxt bearbeite]

 Commons: R.E.M. – Sammlig vo Multimediadateie
Information icon.svg Dä Artikel basiert uff ere fräie Übersetzig vum Artikel „R.E.M.“ vu de änglische Wikipedia. E Liste vu de Autore un Versione isch do z finde.