Rüedi-Kelch

De Rüedi-Kelch

De Rüedi-Kelch isch en vergoldeter Abigmahlskelch us de Ziit um 1640, wo em Pfarrer Hans Heinrich Rüedi ghört het. Er isch sit em 2008 im Bsitz vo de Chilegmeind Böze im Aargau.

De Kelch

De Kelch isch us Silber gfertiget, vergoldet u öpper 18 ½ Zentimeter hoch u wiigt e chli me wi 200 g. Im Kelch isch en Inschrift iigraviirt: IOH: HENRICUS. RUEDI. PASTOR. ECCL: ELFING. & DENSPURANAE. Uf Alemannisch heisst des öpper: Johann Heinrich Rüedi, Pfarrer vo de Chilene z Elfige u Däischbere. Wil de Hans Heinrich Rüedi im 1636 z Elfige sis Amt aaträte het un im 1642 Däischbere abtrännt worde-n-isch, muess de Kelch im Verlauf vo dene 6 Johr in de Bsitz vom Pfarrer Rüedi cho si.
Hergschtellt worde isch er, wi e Graviirig am Fuess vom Kelch zeigt, z Zug. S isch e Marke vo Zug u s Monogramm PK igschtemplet. Wer mit PK gmeint isch, isch ned gsischeret, do git’s numme vermuetige, aber i de Chileschätz vo Staihuuse un Muätital hets Turmmonschtranze vom gliiche Künschtler, wobi di vo Muätital us em Johr 1639 isch.

De Wäg vom Kelch zruck uf Böze

De Hans Heinrich Rüedi isch us de Brugger Unterschicht cho u het eigentlich keis Geld gha, womit er sich so en tüüre Kelch hätti chönne leischte. Wi er glichwohl in de Besitz vo dem Kelch cho isch, isch bisher ned ussezfinde gsi. Au d Frog, wi en Kelch z Zug, also eme katholische Ort, für en Pfarrer im reformiirte Bärner Aargau het chönne hergschtellt werde, isch bis jetzt es Geheimnis blibe. Überhaupt isch de Wäg vom Kelch i de letschte 350 Johr witgehend im Dunkle.
Im Frühjohr 2007 isch er eme Kunschthändler z Züri ufgfalle un er het sich wege de eidütige Graviirig an d Chilegmeind Böze, wo au Effige u Elfige drzue ghöre, gwendet u zum Kauf aabote. Nach eme Spendeufruf hets d Chilegmeind vermöge, de Kelch z kaufe. Site m 2008 isch er im Bsitz vo de Chilegmeind.

Literatur

• Herausgegeben von der Reformierte Kirchgemeinde Bözen: Kirche, Kelch und Kindersegen. Der arme Landpfarrer und sein goldener Kelch, Juni 2009.