Plataforma per la Llengua

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
s Logo vo der Organisazioon

D Plataforma per la Llengua – das isch uf Düütsch «Plattform für d Sprooch» – isch en Organisazioon, wo sech für s Kataloonische engaschiert.

Si isch anne 1993 von es paar Persoone z Kataloonie gründet worde. Der Filosoof Martí Gasull i Roig (1969–2012) isch der wichtigscht vo dene Sproochaktivischte gsi. Anne 2018 het si scho meh weder achtzäätuusig Mitgliider gha. Es het vill bekante Persoone us der Regioon derby.

Es goot dene Lüüt drum, für iiri Landessprooch z luege, öppis z mache ass me s Kataloonische wider meh bruucht und ide Schule glehrt wird; im Alltag selle öppe d Konsumgüeter uf Katalanisch agschribe wärde, und überhaupt selle d Lüüt meh regionali Produkt chauffe. I de Chino müesste d Film Undertitel uf Katalanisch haa. D Organisazioon tuet de Forschigarbete über d Sproochverhältnis hälfe. Und si verlangt, me sell d Ortsnäme vo Kataloonie sproochlich koräkt schrybe. Mit all däm wott si öppis für s sozial Zämehaa im Land mache.

So wie s die Öiropäischi Charta für d Regional- und Minderhäitesprooche seit, wott d Plataforma au s Kataloonische ufwäärte; si chlagt, dr spanisch Staat verletzi d Rächt vo de Lüüt, wo Kataloonisch rede, und si möcht, ass die Sprooch en ofizielli Amtssprooch vo der EU wird.

Bin es paar grosse Firme isch es glunge, die katalanischi Sprooch meh z bruuche, öppe bi Apple, Microsoft, Vodafone, Orange, Telefónica, Carrefour, Nokia, Samsung, Siemens, Facebook, Google, Twitter, IKEA und Codorníu.

Dr Hauptsitz vo der Organisazioon isch z Barcelona, und wyteri Büro het si i de verschidene Piet vo Kataloonie. D Plataforma schaffet au mit der Region Nordkataloonie, em Piet a de Pyrenäe ganz im Süüde vo Frankrych zäme. Si git all halb Joor iiri Zytschrift La Corbella use.

Anne 2008 het d Plataforma der Pryys „Premi Nacional de Cultura“ vo der kataloonische Regionalregierig übercho.

Weblink[ändere | Quälltäxt bearbeite]