Peter Vogel (Zoolog)
Dr Peter Vogel (* 5. Februar 1942 z Bärn; † 12. Jänner 2015) isch e Schwyzer Zoolog gsii. Zue syne Forschigsschwärpinkt het d Suugerfamilie vu dr Spitzmyys (Soricidae) ghert.
Läben un Forschig
[ändere | Quälltäxt bearbeite]Dr Vogel isch z Bärn ufgwachse un isch scho as Chind Mitglid vu dr Bärnische Gsellschaft fir Vogelkund un Vogelschutz wore. Anne 1959 het er sy speteri Frau Lotti chänne glehrt, wun er 1966 ghyrote het.[1] Im Johr 1965 het er fir d Schwyzer Zytschrift Sterna sy erschte Artikel mit em Titel Vorkommen und Brutnachweis der Dickschnabellumme, Uria lomvia, auf Vedoy, Lofoten gschribe. Vu 1966 bis 1970 het er an dr Universität Basel studiert, wun er mit ere Dissertation iber d Morphology un Ontogenese vu dr Spitzmyys zum Ph.D. promoviert het. In dr Zyt vu sym Studium het dr Vogel Praktika in Vogelschutzbiet in dr Schwyz, uf Sylt un z Norwege gmacht. Vum Spotjohr 1970 bis 1973 isch er Direktor vum Centre Suisse de Recherches Scientifiques z Abidjan in dr Elfebaikischte gsii. In däre Zyt het er di ekologische Brobläm vu tropische Chlaisuuger studiert, vor allem vu dr Zwärg-Otterspitzmuus (Micropotamogale lamottei). Vu 1973 bis 1979 het er as usseordelige Professor un vu 1979 bis 2007 as ordelige Professor an dr Universität Lausanne glehrt. Vu 1973 bis 1995 isch er Direktor vum Inschtitut fir Zoology un Ekology an dr Universität Lausanne gsii. Syter anne 2007 isch er Professor emeritus un Ehreprofessor vu dr Universität Lausanne gsii.
Zue s Vogels Inträssebiet hän d Wirbeltierbiology, vor allem d Ekology vu Suuger un Vegel, d Entwicklig un d Reproduktionsbiology, d Bioenergetik, d Lyybtämperatur, d Phylogeografy vu dr Sitzmyys im Mittelmeerruum un s Konkurränzverhalte ghert. Anne 2011 isch em Vogel d Widerentdeckig vu dr Etruskerspitzmuus im Schwyzer Kanton Tessin glunge, ere Art, wu do 116 Johr as verscholle gulte gha het.[2] Derzue het er zue dr Erschtbschryber vu dr Kanare-Spitzmuus (Crocidura canariensis) vu dr Kanarischen Insle, vu dr Hutan-Spitzmuus (Crocidura hutanis) vu Sumatra un vu Crocidura musseri vu Sulawesi ghert.
Wärch (Uuswahl)
[ändere | Quälltäxt bearbeite]- P. Vogel: Vergleichende Untersuchung zum Ontogenesemodus einheimischer Soriciden (Crocidura russula, Sorex araneus und Neomys fodiens), Philosophisch-Naturwissenschaftliche Fakultät der Universität Basel, 1972.
Literatur
[ändere | Quälltäxt bearbeite]- Uni Lausanne Octobre 1973 No. 9:S. 25–26. Kurzbiografie (Online)
Fueßnote
[ändere | Quälltäxt bearbeite]- ↑ Regula Tanner: Von Mäusen und zwei Menschen In: Der Bund vum 13. Mai 2012
- ↑ Weltkleinstes Säugetier im Tessin wiederentdeckt, SRF.TV
Weblink
[ändere | Quälltäxt bearbeite]- Curriculum Vitae vum Peter Vogel bi dr Universität Lausanne
- Erwin Koch: Leidenschaft eines Forschers. Das Leben mit der Maus. In: Der Tagesspiegel. 20. Januar 2013, abgruefen am 20. Januar 2015.
|
Dä Artikel basiert uff ere fräie Übersetzig vum Artikel „Peter_Vogel_(Zoologe)“ vu de dütsche Wikipedia. E Liste vu de Autore un Versione isch do z finde. |