Peter Leuthold

dr Peter Leuthold, 1997

Dr Peter Eugen Leuthold (* 23. Februar 1937 z Villinge, Dytschs Rych; † 13. Februar 2016 z Eerlibach ZH) isch e Schwyzer Eläktroingenieur gsii.

Lääbe

Dr Peter Leuthold isch e Suhn vum Schwyzer Ingenieur Eugen Leuthold gsii, wu syter anne 1929 bim Radiohärsteller SABA z Villinge gschafft het. Sy Mueter isch e Villingeri gsii. D Familie isch anne 1943 in d Schwyz uf Mitlödi un speter uf Nöühuuse zoge.

Dr Leuthold het an dr ETH Züri Eläktrotächnik studiert un het anne 1962 s Ingenieurdiplom iberchuu. Im Johr 1963 het er an dr ETH as Assischtänt gschafft. Vu 1964 bis 1967 isch er wisseschaftlige Mitarbaiter im Philips Forschungslaboratorium z Eindhoven gsii, wun er si mit dr Digitaltächnik un dären ihren Aawändig in dr Nochrichtetächnik bscheftigt ghaa het. 1967 isch er an dr ETH promoviert wore un isch as Oberassischtänt an s Inschtitut fir Hochfrequänztächnik retuurchuu. Anne 1971 het er si uf em Biet vu dr Eläktrotächnik habilitiert.

Im Johr 1974 isch er as Dozänt fir Nochrichtetächnik un Elektrizitetslehr an s 1972 grindet Interkantonal Tächnikum Rapperschwil (ITR) gange un 1977 isch er as Profässer fir Nochrichtetächnik an s Inschtitut fir Hochfrequänztächnik vu dr ETH beruefe wore, wun er bis zue syre Emeritierig anne 2002 glaitet het.

Schwärpinkt vu syre Forschig sin drohtlosi un optischi Iberdragigstächnik, optischi Netzwärch, Modellierig un Mässig vu Iberdragigskanäl un analogi un digitali Modulazionsverfahre gsii

Näbe syre Forschig un Lehr isch dr Leuthold dr erscht Bresidänt vu dr Informationstächnische Gsellschaft vum Schwyzerische Eläktrotächnische Verain (SEV) wore. Derzue isch er Mitgliid vu dr Aidgnessische Fachhochschuelkommission un vu dr Aidgnessische fir Eläktrischi Aalage gsii.

Schrifte (Uuswahl)

• Filternetzwerke mit digitalen Schieberegistern. Philips Research Reports. Suppl. 1967, Nr 5. Dissertation ETH

Literatur

• Peter E. Leuthold, neuer Professor für Nachrichtentechnik, in: Schweizerische Bauzeitung, 13. April 1978
• Prof. Dr. Peter Leuthold, Dodesaazaig vu dr ETH, in: Neue Zürcher Zeitung, 20. Februar 2016, S. 8

Weblink

• Bild uf dr Websyte vu dr ETH Züri

Fueßnote

Dä Artikel basiert uff ere fräie Übersetzig vu dere Version vum Artikel „Peter_Leuthold“ vu de dütsche Wikipedia. E Liste vu de Autore un Versione isch do z finde.