Parthenier

Us der alemannische Wikipedia, der freie Dialäkt-Enzyklopedy

D Parthenier (altgriechΠαρθενίαι, Partheniai, „Jungfrauesöö“) sind spartanischi Uuswanderer gsii, wo ane 706 v. Chr. d Tarent z Apulie gründet hend. D Herkunft vo den Parthenier isch nöd gchlärt und s gitt zwoo Gschichte dodezue.

Nocheme Bricht vom Ephoros vo Kyme hend im Erste Messenische Chrieg di spartanische Chrieger gschwore, si wöörid aselang nöme hammgoo bis si ali Messenier underworffe hebid. Di spartanische Fraue hend aber nochere gwösse Zitt Gsandti gschickt und sich bichlagt. Do hend d Spartaner jungi Chrieger, wo erst spööter in Chrieg trete sind und dromm de Aid nöd abglait ghaa hend, uf Sparta gschickt, demit si mit de Fraue Sex möchid. D Söö vo dene sind den Parthenier gnennt wore.

De Theopomp sait degege, as Helote, wo wäred em Erste Messenische Chrieg fraigloo wore sind, mit de Witwe vo de gfallne Spartaner gschloofe hend, drom sind si Epeunakte „Bettgnosse" gnennt wore. D Söö vo dene sind denn d Parthenier gsii.

Well d Parthenier weniger Recht ghaa hend, hend si sich mit de unfraie Helote zämetue und rebelliert. De Striit isch gschlichtet wore und d Parthenier sind under de Füerig vom Phalanthos uusgwanderet und hend z Apulie d Stadt Tarent gründet. Da söll ane 706 v. Chr. passiert sii, wa mit de archäologische Fund guet öberiistimmt.

Quelle[ändere | Quälltäxt bearbeite]

Literatur[ändere | Quälltäxt bearbeite]

  • Hans-Joachim Gehrke: Partheniai. In: Der Neue Pauly (DNP). Band 9, Metzler, Stuttgart 2000, ISBN 3-476-01479-7, Sp. 362.