Die palestinensich Befreijigsorganisazioon

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
S Logo vo dr PLO

Die Palestinensisch Befreijigsorganisazioon (arabisch منظمة التحرير الفلسطينية ‎ Munaẓẓamat at-Taḥrīr al-Filasṭīniya), churz PLO (vo ängl. Palestine Liberation Organization), isch e Dachorganisazioon vo verschiidene Frakzioone, wo d Verdrätig vo alle Palestinänser, au vo deene im araabische und im nitmuslimische Exiil, aasträbt. Bi witem die sterksti Frakzioon isch d Fatah.

D PLO isch am 28. Mai 1964 uf dr konstituierende Daagig vom Palestinänsische Nazionaalroot (PNC) uf d Iniziatiive vom domoolige egüptische Bresidänt Gamal Abdel Nasser z Jerusalem gründet worde, uso dass s araabische Volk in Palestina im Raame vo dr panaraabische Beweegig e Verdrätig wurd haa.[1] Vo 1969 aa bis zu sim Dood am 11. Novämber 2004 sich dr Jassir Arafat dr Vorsitz vo dr PLO gsi. Er vil zdrue biidräit, ass sich e palestinensischs Nazionaalbewusstsii bildet het mit em Ziil en äignige unabhängige Staat Palestina z gründe. Dr Säggsdaagchrieg 1967 het e Wälle vo palestinensische Flüchtling usglööst: iiri Verdrätig het d PLO zu däm gmacht was si hüte isch.[2] Under em Arafat sinere Füerig het sich d PLO radikalisiert und terroristischi Aaschleeg afo mache. Noch dr Schlacht vo Karame si d die palestinensische Flüchtlingslaager z Jordaanie zur Machtbaasis vo dr PLO worde. Die jordaanischi Armee het d PLO-Milize im Schwarze Septämber 1970 verdriibe. D PLO het sich druf in de Flüchtlingslaager mit Hilf vo usländischer Finanzierig uf soziaali Ziil wie dr Ufbau vo Chrankehüüser und Schuele beschränkt und het gliichzitig im Südlibanon en Armee vo äbbe 20'000 Maa ufbaut.Wo die israelisch Armee 1982 in dr Libanon iigfallen isch, het d PLO iir Hauptkwardier uf Tunis müesse verleege. In de intärne Machtkämpf vo dr PLO, wo denn usbroche si, het dr Arafat sich chönne duuresetze. Im Lauf vo dr Erste Intifada und dr Zwäite Intifada het sich e Machtkampf zwüsche dr PLO und Hamas entwigglet, und d PLO het iiri füerendi Rolle as Verdretig vo dr palestinensische Bevölkerig verloore.[3]

Dr grösst ussepolitisch Erfolg vo dr PLO isch d Anerkennig as „Representant vom palestinänsische Volk“ dur die Veräinte Nazioone im Joor 1974 gsi.[4] Sit em Arafat sim Dood isch dr Mahmud Abbas der Bresidänt vo dr Palestinensische Autonomiibehörde.

Liddratuur[ändere | Quälltäxt bearbeite]

  • Gerrit Hoekmann: Zwischen Ölzweig und Kalaschnikow. Geschichte und Politik der palästinensischen Linken. Unrast, Münster 1999, ISBN 3-928300-88-1.

Weblinks[ändere | Quälltäxt bearbeite]

Fuessnoote[ändere | Quälltäxt bearbeite]

  1. Die Welt, Usgoob 21, S. 4: Ein halbes Jahrhundert PLO, 25. Mai 2014.
  2. Bernhard Chiari, Dieter H. Kollmer, Martin Rink (Hrsg.): Naher Osten. 2. Uflaag. Schöningh, Paderborn [u. a.] 2009, ISBN 978-3-506-76759-2, S. 117.
  3. Bernhard Chiari, Dieter H. Kollmer, Martin Rink (Hrsg.): Naher Osten. 2. Uflaag. Schöningh, Paderborn [u. a.] 2009, S. 114–122.
  4. Bernhard Chiari, Dieter H. Kollmer, Martin Rink (Hrsg.): Naher Osten. 2. Uflaag. Schöningh, Paderborn [u. a.] 2009, S. 121.